DILI, 08 Juñu 2026 (TATOLI)—Prezidente Repúblika, José Ramos Horta, simu ona diploma Orsamentu Retifikativu ho valór millaun $271 ne’e ninia parte asina kedas no entrega ona ba Primeiru-Ministru, Kay Rala Xanana Gusmão, durante enkontru semanál iha sesta semana kotuk.
“Simu ona. Ha’u taka tiha matan asina tiha ona. Sesta-feira ne’e to’o, ha’u asina kedas. Purtantu, entrega kedas ba Primeiru Ministru,” Prezidente Ramos-Horta hateten jornalista sira hafoin hafoin partisipa iha serimónia abertura ba formasaun ho tema ” Prosedimentu husi Kuidadu Saúde Primária” Iha Salaun INSP-TL, iha Komoro, Segunda ne’e.
Tanba, nia hateten, polítika ne’ebé Governu halo ne’e loos, balun enfrenta krize mundiál ne’e entaun labele iha impaktu negativu liu ba povu.
Antes ne’e, Prezidente Ramos-Horta, konsidera mudansa orsamentál ka Orsamentu Retifikativu (OR) ne’ebé Governu lori ba Parlamentu Nasionál (PN) nu[udar pasu normál hodi proteje konsumidór no salvaguarda ekonomia rai-laran husi impaktu krize finanseira mundiál liuliu hasoru folin sasán no kombustível sa’e.
”Ne’e prosesu normal. Kuandu Governu para enfrenta situasaun krize ekonomia mundiál, ne’e para halo inisiativa balun hodi proteje konsumidór, proteje ita-nia ekonomia, atu labele iha impaktu boot ne’ebé sei mosu iha ekonomia tanba folin hotu-hotu sa’e. Tenke halo retifikasaun,” Xefe Estadu hateten ba jornalista sira iha Aeroportu Internasionál Nicolau Lobato, Komoro.
Prezidente foti ezemplu katak alterasaun ne’ebé la’o lori kbiit legál no la’ós hodi aumenta de’it montante orsamentu nian maibé bazeia ba reajustamentu nesesidade nian.
”Ne’e la’ós aumenta orsamentu, maibé muda ba, tenke tuir lei, labele foti orsamentu. Atu book, muda, tenke liuhusi parlamentu,” nia esplika.
Notísia Relevante: PM Xanana konsidera orsamentu retifikativu atu garante estabilidade fiskál-globál
Jornalista : Hortêncio Sanchez
Editór : Cancio Ximenes
