COVALIMA, 04 Outubru 2024 (TATOLI) – Sekretaria Estadu Igualdade (SEI), liuhusi Diresaun Nasionál ba Dezenvolvimentu Igualdade Jéneru divulga informasaun kona-ba apoiu fundu tranferénsia públika ba feto sira iha Covalima.
Diretór Nasionál Dezenvolvimentu Igualdade Jéneru, José de Carvalho, dehan presiza sensibiliza informasaun kona-ba fundu transferénsia públika, tanba verba ne’e nia mekanizmu ho rotativu, nune’e balun iha ona koñesimentu no seluk seidauk.
“Ita hatene kada tinan Sekretaria Estadu Igualdade prevee orsamentu fundu transferénsia públika atu hakbiit partisipasaun feto iha vida ekonómia no fó hanoin ba asosiasaun feto hatene nia papél atu hala’o nia serbisu”, José de Carvalho hato’o iha salaun AMC, ohin.
Nune’e nia dehan SEI rejista asosiasaun liuhusi kongresu iha nivel munisípiu hahú 2019 to’o 2024 hamutuk hitu no seidauk rejista iha Servisu Munisipál Notariadu. Tanba ne’e, SEI koordena ho Servisu Rejistu Notariadu atu asegura asosiasaun feto hodi bele hetan legalidade iha Ministériu Justisa (MJ).
Dirijente ne’e esplika razaun seidauk rejista iha Servisu Munisipál Rejistu Notariadu, tanba hafoin realiza kongresu iha 2019, iha 2020 hasoru kedan covid-19.
Asosiaun feto ne’ebé hetan ona legalidade husi Ministériu Justisa mak Asosiasaun Feto iha Munisípiu Díli, Liquiçá, Manufahi no Baucau.
Orsamentu ne’ebé SEI disponibiliza ba grupu 48 hahú 2019 to’o 2024 hamutuk $91.227. Dadaun ne’e, SEI simu ona proposta ba asesu fundu husi Covalima hamutuk 23 ne’ebé sei verifika no sei preve mós orsamentu ba 2025.
Parlamentu Nasionál aprova, kada tinan, orsamentu ba transferénsia públika hamutuk rihun 300 atu apoia ba gropu feto, Organizasaun-Naun Governametál no sosiedade sivíl sira ne’ebé haree kona-ba asuntu feto nia partisipasaun iha vida polítika no ekonómika.
Diretora Servisu Munisipal ba Jestaun Merkadu no Turizmu, Teresa Pires, rekomenda ba Sekretaria Estadu Igualdade atu divulga informasaun kona-ba asesu fundu transferénsia públika ba to’o iha postu tanba feto sira barak laiha koñesementu kona-ba apoiu ida ne’e.
“Ia-boot sira fahe informasaun labele mai de’it iha munisípiu, maibé presiza ba to’o iha postu administrativu sira, tanba feto iha área rurál la asesu informasaun kona-ba SEI apoiu funba ba feto sira”, dehan.
Notísia relevante: Asosiasaun apoia SEI hodi kapasita feto envolve iha vida polítika
Jornalista: Celestina Teles
Editora: Maria Auxiliadora
