COVALIMA, 03 Outubru 2024 (TATOLI) – Asosiasaun feto iha Covalima apoia atividade Sekretaria Estadu Igualdade (SEI) hodi halo promosaun ba igualdade jéneru, liuhusi sensibiliza lei ne’ebé relasiona ho direitu feto no prepara feto potensiál hodi envolve iha vida polítika.
Sekretária Estadu Igualdade (SEI), Elvina de Sousa Carvalho, hateten ko’alia kona-ba implementasaun Lei Podér Lokál diskute mós sobre partisipasaun feto iha vida polítika, entaun partidu polítiku presiza sensivel hodi halo nomeasaun ba kargu xefia no iha obrigasaun hodi hakbiit organizasaun feto atu kompete.
Tuir governante ne’e, realidade hatudu katak iha realizasaun eleisaun ba lideransa komunitária iha Covalima, rezultadu hatudu feto na’in-ida de’it mak reeleita ba xefe suku no feto sira seluk sai xefe aldeia. Tanba antes ne’e, iha feto na’in-sia de’it mak sai xefe aldeia, maibé agora na’in-12 ona.
Nune’e, SEI nia papél atu hakbiit partisipasaun feto iha vida polítika no kapasita nafatin feto iha nivel foti desizaun, apoiu ekonomia feto iha família. Ba ida ne’e, tuir Elvina de Sousa Carvalho, SEI labele halo serbisu mesak, maibé presiza kontribui mós husi asosiasaun feto munisipál sira.
“Ita hotu iha obrigasaun atu muda mentalidade sosiedade nian ne’ebé hanoin katak feto labele ukun ita. La’e, feto la’ós atu ukun mane, feto atu bá lidera sosiedade, maibé sé de’it mak hetan oportunidade sai deputada, prezidente autoridade iha obrigasaun atu serví ho di’ak, nune’e bele hetan konfiansa husi povu hodi hatudu katak feto bele lidera instituisaun sira”, governante ne’e hateten iha kongresu asosiasaun feto ba datoluk ho Tema “Haforsa Asosiasaun Feto Munisipál hodi kontribui ba desentralizasaun podér lokál ne’e importante atu feto sira envolve iha vida polítika”, iha salaun AMC, ohin.
Sekretária Estadu ne’e dehan daudaun ne’e feto mak lidera Parlamentu Nasionál no kuaze 40% asume kargu iha Parlamentu no sai membru Governu.
Reprezentante Prezidente Autoridade Munisipál Covalima, Alberto Moniz de Araújo, relata katak Covalima iha suku 30. Husi númeru ne’e, feto nain-ida mak reeleita ba xefe suku no feto na’in-haat asume kargu nu’udar diretora servisu munisipál Covalima.
“Ami halo balansu jéneru hodi asume kargu. La’ós mane de’it mak asume, maibé feto mós bele hanesan haree iha área militár, feto na’in-rua sai komandante eskuadra no rua sai adjunta iha Covalima”, nia dehan
Autoridade ne’e rekoñese katak feto sira ne’ebé asume pozisaun iha Covalima ho porsentu ki’ik, maibé autoridade mós fó ona oportunidade ba feto sira atu lidera.
GMPTL enkoraja feto prepara aan kompete iha eleisaun kámara munisipál
Iha ámbitu kongresu ne’e, membru Grupu Muller Parlamentár Timor-Leste (GMPTL), Bendita Magno, enkoraja mós feto Covalima atu prepara aan hodi kompete iha eleisaun kámara munisipál.
“Feto Covalima forte no brani atu disemina informasaun kona-ba ita-boot sira-nia knaar hodi hasoru eleisaun munisipál. Saida mak ita-boot sira bele halo bainhira sai membru asembleia munisipál mak presiza aprende estatutu no rejimentu asembleia munisipál”, Bendita Magno dehan.
Nia salienta, daudaun ne’e, halo hela preparasaun atu realiza eleisaun kámara munisipál no espera katak Sekretaria Estadu Igualdade sensibiliza ona informasaun ba feto sira atu esforsa aan, nune’e bele ukun nia rai rasik. “Atu hala’o eleisaun kámara munisipál foin mak iha preparasaun. Feto potensiál brani atu foti desizaun”, nia hateten.
Membru Parlamentu ne’e dehan papél feto importante iha prosesu dezenvolvimentu no feto mós kontribui ba funu no nia kontribuisaun iha kualkér situasaun.
Iha sorin seluk, Prezidente Asosiasaun Feto Covalima, Maria Fátima, promete sei halo esforsu hodi kapasita feto sira oinsá brani kompete ho mane.
“Ami prepara feto oinsá bele kompete. Asosiasaun hala’o serbisu hodi fó formasaun, halo advokasia, disemina kona-ba Lei Podér Lokál”, nia realsa.
Notísia relevante: AEMTL kria ona estrututura iha Covalima
Jornalista: Celestina Teles
Editora: Maria Auxiliadora
