COVALIMA, 04 dezembru 2023 (TATOLI) – Asosiasaun Emprezária Feto Timor-Leste (AEMTL, sigla portugés) kria, segunda ne’e, estrutura feto emprezariál iha munisípiu Covalima.
Prezidente Fiskál Nasionál AEMTL, Anastácia Amaral, lembra katak AEMTL kria iha tinan 2008, maibé nia estrutura estabelese de’it iha nasionál, tanba ne’e asosiasaun hakarak halo espansaun hodi kria estrutura iha munisípiu hotu.
“Ami halo ona espasaun hodi kria ami-nian estrutura ba feto ne’ebé sai emprezária lokál iha Covalima”, Anastácia Amaral haktuir ba jornalista sira, iha salaun CNE Covalima, iha Tabakolot.
Objetivu AEMTL kria nia estrutura iha munisípiu tanba feto sira la’ós organiza aan de’it iha nasionál, maibé mós iha munisípiu hotu nune’e bainhira iha atividade atu partisipa formasaun la presiza husi nasionál mak tenke mai to’o munisípiu.
Emprezária Aurélia Doutel Sarmento ne’ebé partisipa iha atividade ne’ebé organiza husi AEMTL hatete katak ida ne’e bele habelár estrutura hodi luta ba direitu no hakbiit feto iha vida ekonomia no kria kondisaun no oportunidade ba feto emprezariál.
Eventu ne’ebé ne’e partisipa husi feto emprezária iha Covalima hamutuk 20-resin. Daudaun ne’e, AEMTL kria ona nia estrutura iha munísipiu Ainaro, Aileu, Baucau, Bobonaro,Covalima ,Ermera, Manatutu no Viqueque.
Notísira relevante: lADE-CCI-TL no AEMTL lansa feira empodera feto iha vida negosiu
Jornalista: Celestina Teles
Editora: Maria Auxiliadora
