DILI, 24 outubru 2023 (TATOLI) – Governu liuhosi Institutu Apoiu Dezenvolvimentu Emprezariál (IADE), Kamara Komérsiu Industria Timor-Leste (CCI-TL, sigla portugés) Asosiasaun Empresariál Feto Timor-Leste (AEMTL,sigla portugés) parseira ho Uniaun Europeia no Programa Nasaun Unida ba Dezenvolvimentu (PNUD), tersa ne’e, lansa feira empodera feto no grupu alvu sira iha vida negosiu.
Feira ho tema “Empodera feto ho grupu alvu sira iha vida negosiu” iha ámbitu konkluzaun ba programa husi projetu Inisitiva Spotlight” ne’e sei hala’o durante loron tolu, hahú hosi tersa (24/10) to’o kinta (26/10) iha Portu Dili.
Notísia relevante: UCCLA-AMD-AEMTL asina MoU promove emprezaria feto iha Dili
“Objetivu husi programa ne’e, ita hakarak atu promove paritisipante sira tuir formasaun liuhusi IADE, CCI-TL no AEMTL kona-ba planu negósiu”, esplika Prezidente Asosiasaun Emprezariál Feto Timor-Leste (AMTL), Erguilina Alves, iha ámbitu abertura feira ne’e iha Portu-Díli.
Nune’e, Prezidente AEMTL husu ba Governu atu kontinua apoiu ba feto empreendedorismu liu husi formasaun no akompañamentu nia atividade negosiu atubele metin no sustentavel ba familia no sosiedade.
“Ba maluk feto sira presiza iha rendimentu rasik atubele sustenta familia. Feto hotu bele halo negosiu atu hetan rendimentu rasik. Labele deziste iha negósiu, maibé konsistente no persistente ”, nia ekoraja.
Iha biban hanesan, Diretór Ezekutivu IADE, Marcelino Filomeno Belo, afirma projetu inisitiva Spotlight konsege forma formadór sira atu kontinua fó formasaun ba feto empreendedorismu iha Timor-Leste.
“Kooperasaun ho parseiru dezenvolvimentu di’ak tebes husi 2021 to’o 2023 bele apoia Governu hodi forma formador sira atu bele kotinua fó formasaun ba feto empreendedorismu”, nia akresenta.
Notísia relevante: IADE no PNUD formaliza akordu ba implementasaun projetu YEES
Nune’e mós, Prezidente Kamara Komérsiu Indústria Timor-Leste (CCI-TL), Jorge Serano, reforsa setór privadu presiza partisipasaun feto atu hadia ekonomia familia.
“Feto sai emprezaria ne’e di’ak liu. Vida negosiu presiza partisipasaun ema hotu nian, la’os mane de’it”, katak.
Nia agradese ba apoia tomak husi Uniaun Europeia ne’ebé destina fundu liuhusi programa inisitiva Spotlight tanba Timor-Leste iha produtu lokál barak ne’ebé bele dezenvolve liuhosi atividade negosiu.
Entretantu, Emprezaria Feto hosi Munisípiu Viqueque, Natalia de Araújo Pereira, sente kontente bainhira partisipa feira ne’e atubele promove nia produtu husi área rurál hanesan homan akadiru, tais feto no mane, hena pontu kruz, foos rai ho presu entre $5 to’o $65.
Tuir observasaun Jornalista Agência TATOLI iha tereñu nota aprezenta sira nia produtu hanesan gastronomia lokál, tais, hena suku no seluk tan ne’ebé aprezenta husi grupu vulneravel sira hanesan Kodiva, ema ho defisiensia, no feto iha área rurál husi munisípiu Bobonaro, Ermera, Viqueque inklui Díli.
Iha feira ne’e, Governu no Parseiru sira sei atribui sertifikadu ba ema nu’udar formador ba feto empreendedorismu. Atividade feira ne’e hetan apoia fundu husi Uniaun Europeia $39.500, Timor Telekom $400 no Heineken $1.500.
Notísia relevante: AEMTL Kompromete Sai Autór Ekonómiku no Produtivu
Jornalista: Jesuína Xavier
Editór : Florencio Miranda Ximenes
