DILI, 04 abríl 2023 (TATOLI) – Institutu Apoiu Dezenvolvimentu Emprezariál (IADE) no Programa Nasaun Unida ba Dezenvolvimentu (PNUD) selebra, iha tersa-feira ne’e, akordu ba implementasaun Projetu Kompeténsia ba Empreendedorizmu no Empregu ba Juventude (YEES, sigla inglés) iha munisípiu Dili, Baucau, Ermera no Liquiçá.
Akordu ne’e asina hosi Diretór-Ezekutivu IADE, Filomeno Marcelino Belo, no reprezentante PNUD, Adeline Carrier, iha salaun IADE, Mandarin. PNUD apoia osan ho valór $279.150 ba IADE atu implementa projetu ne’e ho durasaun tinan-ida, ne’ebé programa ne’e sei hahú iha fulan-abríl.
“IADE nia knaar importante mak sei kapasita juventude emprezariál sira, liuliu ba sira ne’ebé foin hahú negósiu no sira ne’ebé estabelese nanis ona. Sei fasilita sira liuhosi inkubasaun ida, nune’e depois formasaun IADE nafatin fó apoiu para sira hodi kontinua sira-nia negósiu”, Filomeno Belo hatete iha marjen selebrasaun akordu ne’e.
Nia hatutan projetu ne’e sei implementa iha munisípiu haat no IADE sei koordena mós ho PNUD atu promove mós bá munisípiu sira seluk.
Reprezentante PNUD, Adeline Carrier, afirma katak importante tebes apoia joven sira hodi hasa’e kreximentu ekonómiku Timor-Leste nian.
“Daudaun ne’e populasaun 72% menus husi tinan 35 maka dezempregu no jovens 20%, entre tinan 15 no 24, maka lahetan serbisu, formasaun no edukasaun. Hodi hasoru dezafiu sira ne’e, UNDP no KOICA hamutuk ho Governu Timor-Leste lansa ona projetu YEES. Ami iha kompromisiu hamutuk hodi aumenta asesu joven Timor-Leste ba oportunidade hodi sai emprendedór”, Adeline Carrier dehan.
Nia agradese mós ba vontade husi IADE ba formasaun joven emprendedór sira ne’ebé agora hola parte iha investimentu ba futuru, liuhosi diversifikasaun ekonomia iha Timor-Leste.
Partisipa iha asinatura akordu ne’e Ministru Koordenadór Asuntu Ekonómiku, Joaquim Amaral, Vise-Ministru Komérsiu no Indústria, Domingos Lopes Antunes, Diretora Institutu Nasionál Dezenvolvimentu Mão de Obra, Isabel Fernandes de Lima, reprezentante KOICA no Kámara Komérsiu Indústria Timor-Leste.
Notísia relevante: https://tatoli.tl/2022/07/22/koica-kontribui-millaun-5998-implementa-projetu-yees/
Jornalista: Antónia Gusmão
Editora: Maria Auxiliadora
