DILI, 22 jullu 2022 (TATOLI)–Ajénsia Kooperasaun Internasionál Koreanu (KOICA, sigla inglés) kontribui fundu hamutuk $5.998.176,67 ba Timor-Leste hodi implementa projetu Youth Employment Entrepreneurship Skills (YEES).
Ministru Finansa (MF), Rui Augusto Gomes, reprezenta Governu Timor-Leste, no Eunju Cha nu’udar reprezenta KOICA iha Timor-Leste hodi asina akordu.
Ministru Finansa, Rui Augusto Gomes, hateten, apoia hosi KOICA sei uza ba abilidade no dezenvolvimentu emprezariál ba tinan-lima hodi prepara timor-oan sira asesu ba oportunidade serbisu.
“Apoiu ne’e asina hanesan kontinuasaun kompromisu Governu no povu Koreia nian, ne’ebé haree liu iha parte ne’ebe presiza tebes. Ho apoiu ne’ebé maka iha, ha’u reprezenta Governu no povu Timor-Leste hakarak agradese ba Governu no povu Koreia ba apoiu ne’ebé oferese ona hodi responde ba situasaun defisil ne’ebé ami-nia nasaun enfrenta, liuliu iha área ekonomia,” Ministru akresenta.
Notísia relevante: Governu no KOICA sei selebra akordu projetu YEES
Totál orsamentu ba implementasaun projetu ne’e hamutuk $7.320.946,67 kompostu hosi KOICA $5.998.176,67, Programa Nasaun Unida ba Dezenvolvimentu (UNDP, sigla portugés) $490.000 no Governu Timor-Leste liuhosi Ministériu Turizmu, Komérsiu no Indústria (MTK) $832.770.
Biban hanesan, Vise-Ministru Komérsiu no Indústria, Domingos Lopes Antunes, reprezenta MTKI asina akordu ho UNDP tanba parte rua ne’e mak sei implementa projetu ne’e. Aleinde ne’e, KOICA mós asina ho UNDP tanba parseiru ne’e kontribui fundu ba projetu.
“Projetu ne’e implementa hahú hosi loron asina ba oin. Ami ho UNDP serbisu hamutuk tinan-rua ona ba programa kompetisaun negósiu inovativu inklui projetu YEES ne’e fó tan oportunidade ba joven sira ne’ebé iha planu negósiu di’ak,” nia dehan.
Nune’e mós, Embaixadór Koreia iha Timor-Leste, Jeong ho Kim, hateten, apoiu finanseiru ne’ebé fó liuhosi KOICA nu’udar kompromisu Governu Koreia atu tulun Governu Timor-Leste hodi hamenus dezempregu.
“Projetu YEES sei apoiu Governu hodi prepara formasaun adekuatu ba joven sira hodi hetan abilidade atubele responde ba merkadu,” Diplomata ne’e garante.
Nia dehan, Governu Koreia haksolok tebes bele apoiu finanseiru atu tulun joven timor-oan sira ne’ebé serbisu iha Koreia Súl, Austrália inklui nasaun Europa sira hodi bele hala’o atividade negósiu bainhira filafali mai Timor-Leste.
Timor-oan 4.000 resin mak ba ona serbisu iha Koreia Súl, iha área oioin, desde tinan 2009 no tinan ne’e simu tan traballadór timor-oan 700.
Projetu ne’e hala’o durante tinan-neen iha munsípiu Dili, Baucau, Ermera, no Liquiçá, ne’ebé sei benefisia ema 35,105, kompostu hosi benefisiáriu direta 24.442 no indireta 10.663.
Jornalista : Antónia Gusmão
Editora : Julia Chatarina
