VIQUEQUE, 31 dezembru 2024 (TATOLI)-Selebra loron nasionál éroi, veteranu hamutuk ho família éroi sira sunu lilin no kari ai-funan hodi dignifika no valoriza éroi sira-nia luta ba libertasaun Timor-Leste.
Iha selebrasaun misa ne’e, amu selebrante Pe, Manuel Pinto, SVD, hateten, selebra loron nasionál ba éroi sira-ne’ebé dedika sira-nia aan ba luta ukun rasik aan Timor-Leste, iha prosesu luta éroi barak lakon vida inklui éroi husi postu administrativu Uatulari ne’ebé dadauk ne’e sei rai iha uma-mahon.
“Ho selebrasaun ne’e ita lembra motto husi saudozu Nicolau Lobato hateten ho lian portués katak ‘A última bala é a minha vitória’ signifika bala ikus maka ha’u-nia vitória. Ba reflesaun ne’e, kuandu iha funu saida mak ita hasoru mak enfrenta inimigu, iha motivasaun rua nia mate ou moris. Atu manán funu tenke ho estratéjia funu hodi bele manán funu”, Pe, Manuel Pinto, hateten iha misa selebrasaun loron nasionál ba eroi, iha resintu administrativu Uatulari, ohin.
Amu selebrante ne’e hatutan, iha funu laiha ema ida maka la mate, maibé presiza mate atu nune’e ema seluk kontinua luta.
“Ho mate haforsa espirítu no motiva ema, atu luta. Nune’e ba selebrasaun ida-ne’e inserta mós sauduzu Nicolau Lobato nian kada tina-tinan. Nune’e ba ita iha ne’e (Uatulari) ita-nia saudozu sira-nia restu mortais tau iha uma-mahon sira-ne’e mate tan nahok, hadau ema seluk nian sasán no hadau ema seluk nian rain, maibé sira mate tanba defende ita-nia rai ida-ne’e, defende soberania no defende povu Timor Leste”, amu ne’e haklaken.
Nune’e, Nai-lulik ne’e dehan, independénsia Timor-Leste ida-ne’e manán ho ruin, raan, terus, tanis, hafoin manán independénsia funu naruk ida-ne’e.
“Ita-nia éroi sira-nia luta Timor-Leste hetan ona independénsia. Iha independénsia ne’e éroi sira sai ajente transformasaun ba ukun rasik aan. Nune’e ba indenpendénsia ne’e ha’u husu ba jerasaun foun veteranu oan sira no joven sira seluk mak sai ajente prinsipál ba transformasaun ba dezenvolvimentu tanba independénsia ita atinji ona, ita presiza transformasaun ida hodi lori rai ne’e ba oin”, nia akresenta.
Iha selebrasaun ne’e Pe, Manuel enkoraja jerasaun foun sira atu kontinua halo transformasaun hodi luta ba prosesu dezenvolvimentu Timor-Leste nian.
“Atu lori nasaun ne’e ba oin, jerasaun foun sira presiza kapasitasaun, edukasaun hodi prepara aan estuda, estuda no estuda, envolve aan iha adminitrasaun públika sira hodi dudu rai ne’e ba oin,” nia hato’o.
Hafoin misa ramata, Prezidente komisaun rekolla restu mortais postu Uatulari, Tomas Soares da Silva, haktuir, selebrasaun ne’e inisiativa mai husi veteranu, família éroi, autoridade lokál hodi realiza misa ba selebrasaun loron éroi nasionál.
“Ho selebrasaun ne’e ho objetivu atu valoriza ita-nia eroi sira-nia luta hahú husi prezidente Nicolau Lobato no éroi seluk ne’ebé dadauk ne’e ita rai iha uma-mahon Uatulari. Selebrasaun ne’e ita realiza misa, kari ai-funan no fó bensaun ba kaixaun éroi sira-nian ne’ebé iha uma-mahon”, Tomas subliña.
Tuir dadus restu mortais ne’ebé dadauk ne’e rai iha uma mahon Uatulari hamutuk rihun -1.200.
Depois, bensaun ai-funan no lilin hotu kontinua despede serimónia ba éroi sira no sunu lilin, kari ai-funan iha krus boot iha uma-mahon iha postu Uatulari.
Iha selebrasaun ne’e, partisipa husi autoridade, Polísia Nasionál Timor-Leste (PNTL) eskuadra Uatulari, veteranu, família éroi sira husi postu Uatulari.
Jornalista : Vitorino Lopes da Costa
Editór : Rafael Ximenes de A. Belo
