BOBONARU, 03 Juñu 2026 (TATOLI) – Kondisaun infraestrutura ne’ebé aat iha Eskola Bázika Filiál (EBF) no Eskola Pré-Eskolár (EPE) Taimea sai preokupasaun boot ba profesór no inan-aman sira, tanba kalen, ai no bebak husi edifísiu eskola konsidera la seguru ba estudante sira.
Koordenadora EBF Taimea, Natalina dos Santos Pereira, esplika atualmente iha sala aula tolu ne’ebé estragu ho kondisaun grave no presiza atensaun lalais husi governu tanba provizóriu hanesan uma-kakuluk ho de’it fatuk no rai-henek.
Nia fundamenta, sala tolu ne’ebé kondisaun grave konstrui dezde tinan 2009 liuhusi programa Pakote Referendu, enkuantu sala tolu kondisaun di’ak konstrui ho apoia husi governu Japaun iha tinan 2013 liubá.
Notísia relevante: Autoridade Bobonaro lansa konstrusaun foun pre-eskolár Gelokaer Daitete
“Ami-nia eskola EBF Taimea iha sala tolu mak aat grave, ami husu ba governu atu bele tau-matan ba eskola ida-ne’e bele hadi’a, kondisaun eskola ladi’ak fó impaktu ba ensinu no aprendizajen tanba ita ta’uk udan anin, eskola ho kondisaun ne’ebé mak aat, entaun labarik labele tama, ami mós akompaña labarik, sé kuandu atu tama ba sala ita ta’uk kalen atu monu tún kona labarik, entaun bainhira atu halo ensinu aprendisajen ami sei haree ho kondisaun klima,” nia informa ba TATOLI, iha kna’ar-fatin, kuarta ne’e.
Koordenadora ne’e esplika katak durante tinan barak liubá, anin forte regularmente sobu kalen eskola nian. Bainhira akontese, profesór ho estudante sira tenke hamutuk hadi’a temporariamente kalen ne’ebé estraga atu bele kontinua atividade eskolár.
Eskola referida risku ba dezastre naturál tanba lokalizasaun iha área aas no nakloke, nune’e edifísiu sira hetan impaktu diretamente husi anin forte husi oin no parte kotuk.
“Iha-ne’e ami mesak profesora de’it, mane ida, entaun dadeer kuandu ami mai akontese anin sobu kalen ne’e foti sa’e, ami tenke obriga ho labarik sira, haruka sira sa’e ba, ami buka maneira tau rai-henek iha karon hodi hanehan fali kalen, dalaruma anin sobu tiha, ami kria enkontru ho inan-aman, kalen balu uza hodi taka ne’e kontribuisaun husi inan-aman no sira rasik mai servisu hodi hadi’a,” nia katak.
Natalina mós informa katak, alende infraestrutura ne’ebé aat, EBF Taimea mós enfrenta problema falta profesór.
Tanba menus rekursu umanu, Koordenadora ne’e konfirma eskola ne’e obrigatoriumente implementa sistema multi-klase, ne’ebé akumula hamutuk estudante sira husi nível diferente iha sala ida de’it.
“Atualmente ami iha estudante hamutuk ema na’in-143. Tanba falta profesór, primeiru no segundu anu aprende hamutuk, terseiru ho kuartu anu mos hamutuk, kintu ko sestu anu mak mantein ida-idak nia,” nia hateten.
Koordenadora Eskola Pré-Essolár (EPE) Taimea, Sofia Maia Cosme, mós manifesta preokupasaun hanesan kona-ba seguransa labarik sira, liuliu estudante ho idade ki’ik.
Nia akresenta, bainhira udan no anin forte, parte ida husi estudante sira la mai eskola tanba tau ho ai no kaken ne’ebé dodok no bele monu.
“Ami sente ta’uk no pániku ho labarik sira ne’ebé sei ki’ik. Ami husu ba Estadu atu toma atensaun ba ami-nia eskola atu sira bele aprende iha fatin ne’ebé seguru no konfortável,” Sofia fó hanoin ba Governu.
Enkuantu EPE Taimea atualmente iha estudante hamutuk ema na’in-62.
Jentente eskola no Komunidade Taimea espera Governu bele halo intervensaun lalais atu hadi’a infraestrutura eskolár no aumenta númeru profesór, hodi garante ambiente aprendizajen ne’ebé seguru no efetivu ba estudante hamutuk ema na’n-205 iha área ne’e.
Notísia relevante: ME sei estabelese tan sentru programa intensivu pré-eskolár 13 iha Bobonaru
Jornalista: Sérgio da Cruz
Editór: Evaristo Soares Martins
