BOBONARO, 28 fevereiru 2024 (TATOLI)-Autoridade Munisipál Bobonaro (AMB) liuhosi Sekretáriu Autoridade Asuntu Planeamentu, Investimentu no Dezenvolvimentu Integradu, Semedo Laco Costa, tersa ne’e halo lansamentu fatuk dahuluk ba konstrusaun foun sala tolu iha pre-eskolár Gelokaer, aldeia Daitete, suku Ritabou, postu administrarivu Maliana ne’ebé tama iha projetu regulár Programa Nasionál Dezenvolvimentu Suku (PNDS) tinan 2023-2024.
Sekretáriu Autoridade Asuntu Planeamentu, Investimentu no Dezenvolvimentu Integradu, Semedo Laco Costa, apela ba komunidade sira atu servisu ho responsablidade hodi garante obra refere bele hatudu kualidade di’ak, nune’e bele fasilita estudante sira tuir prosesu ensinu no aprendizajen iha fatin dignu.
Notísia relevante: Bobonaro identifika fatin 50 realiza programa eskola iha uma
“Ha’u hakarak hateten PNDS ne’e programa própriu suku nian, ita-boot sira-nia programa, planu ita-boot sira mak halo, depois governu aloka orsamentu direitamente ba suku, lori mai ita-boot sira mak jere, depois ita-boot sira mak halo konstrolu ba ninia kualidade. Ida-ne’e ita-boot sira tenke sente na’in ba servisu no obra ne’e, keta halo intregra tiha ba to’o servisu kualidade laiha, ita hakarak osan ne’ebé ita tau atu rezolve duni ita-nia problema,” nia hateten.
Durante ne’e autoridade munisípiu simu beibeik pedidu atu halo konstrusaun ba eskola ne’e liuhosi programa Planu Dezenvolvimentu Integradu Munisipál (PDIM) maibé la konsege tanba tinan neen ba kotuk ne’e governu sentrál la aloka orsamentu.
Reprezentante Sekretáriu Tékniku PNDS, Joens Pinto, subliña projetu refere implementa bazea ba prioridade ne’ebé komunidade hili.
“Ida-ne’e bazea ba ita-boot sira-nia nesesidade, tanba ne’e mak ohin loron ita halo lansamentu primeira pedra, husu ba komunidade hotu no inan-aman sira, buat-ne’ebé mak ita-boot sira hili, ita-boot sira tau-matan ba,” nia fó hanoin.
Koordenadór EBF Golokaer, Justino Soares, agradese ba governu no prontu kolabora ho ekipa tékniku PNDS no komunidade hotu hodi fó susesu ba obra ne’e.
“Ami mehi atu ba eskola ne’e kleur tiha ona, durante ne’e ko’alia maibé ohin konsege realiza liuhosi PNDS ne’ebé aloka orsamentu ne’e mai iha-ne’e, ne’e ami apresia, tanba fatin ida-ne’e sai fatin sentru, foin lalais ne’e ami matríkula simu labarik mak labele, barak mak mai tan,” nia akresenta.
Xefe suku Ritabou, postu administrativu Maliana, Maximiano dos Santos Araújo, esklarese eskola ne’e sei akumula estudante sira hosi aldeia tolu ne’ebé pertense ba suku Ritabou no aldeia ida hosi suku Manapa, postu administrativu Cailaco.
“Ita orienta ba xefe aldeia sira foti dadus, totál alunu ho ida tinan-haat to’o tinan-lim hamutuk 61 ne’e kobre de’it aldeia tolu Ritabou nian, aldeia sorin suku Manapa nian seidauk, posiblidade sei aumenta hosi númeru 61 ne’e,” nia katak.
Enkuantu obra refere implementa ho orsamentu hamutuk $44,500 ho durasaun tempu fulan-haat.
Notísia relevante: Konstrusaun sala tolu iha EBC Beremanu atinje 50%
Jornalista: Sérgio da Cruz
Editór: Evaristo Soares Martins
