BOBONARO, 22 setembru 2023 (TATOLI) – Ministériu Edukasaun habelar projetu pilotu programa eskola iha uma ba munisípiu Bobonaro ne’ebé sei implementa iha fatin 50 ba suku sira-ne’ebé konsideradu iha liu área rurál.
“Ita munisípiu Bobonaro hetan fatin ba implementasaun eskola iha uma ne’e hamutuk 50,” Diretór Servisu Munisipál Edukasaun Bobonaro, Crispim Moniz, hato’o asuntu ne’e liuhosi diálogu ho Prezidente Autoridade Munisípiu Bobonaro no líder lokál sira, realiza iha salaun administrasaun postu Bobonaro, kuarta ne’e.
Diretór ne’e subliña, molok implementa programa refere, sei halo uluk levantamentu dadus hodi identifika labarik sira ho idade tinan 5 to’o tinan 7 ne’ebé mak seidauk eskola.
Hafoin halo levantamentu, dadus hirak ne’e sei aprezenta ba autoridade munisipál no enkamiña ba iha nasionál atubele halo rekrutamentu ba manorin-na’in sira.
Crispim Moniz, haklaken tuir kritéria ema ne’ebé atu sai manorin-na’in, sidadaun Timor ho nia abilitasaun literária baxarelatu no finalista iha área edukasaun.
“Ita konsidera finalista ne’e tanba, atu rekruta sira, bainhira sira dezempeña funsaun eskola iha uma ne’e, konsidera sira hanesan profesór estajiadu, sira finaliza atividade ne’e, aban bainrua kuandu iha rekrutamentu sira-ne’e sei hetan konsiderasaun,” nia haktuir.
Nia dehan, andamentu atividade ba programa ne’e sei hala’o iha fatin sira hanesan sede aldeia, komunidade nia uma, karik na’in autoriza. Programa ne’e nia durasaun implementa semana tolu resin de’it.
“Depois ida-ne’e labarik sira tuir prova, hetan sertifikadu sira bele kontinua oan sira-nia estudu iha nivél ensinu Báziku,” nia subliña.
Prezidente Autoridade Munisípiu Bobonaro, Ernesto de Oliveira Barreto, husu líder lokál identifika fatin nune’e bele hahú ona programa refere.
“Programa ne’e di’ak tebes atu ita-nia oan sira-ne’ebé la eskola, bele iha oportunidade ba eskola,” nia katak.
Programa ne’e governu establese atu promove no eleva taxa partisipasaun edukativa ho objetivu prinsipál atu fasilita labarik sira frekuente estudu iha nível pre-eskolár, hodi prepara-aan atubele kompete iha nível ensinu báziku.
Notísia relevante: MEJD aloka millaun $2-resin ba Programa Eskola iha Uma faze daruak
Jornalista : Sérgio da Cruz
Editór : Evaristo Soares Martins
