DILI, 31 maiu 2023 (TATOLI) – Ministériu Edukasaun, Juventude no Desportu (MEJD) kontinua prevee tan millaun $2-resin ba Programa Eskola iha Uma faze daruak ne’ebé sei abranje ba munisípiu Baucau, Ermera no Bobonaro.
Diretór Nasionál Edukasaun Pré-Eskolár, Tomás Pereira, informa daudaun Ministériu Edukasaun prepara hela atu halo enkontru ho autoridade sira, servisu edukasaun munisipál no superintendente edukasaun sira atu tau hanoin hamutuk hodi bele halo koordenasaun ho administradór postu administrativu, xefe suku no xefe aldeia sira iha munisípiu tolu refere.
Nia dehan preparasaun sira ne’e importante tebes tanba munisípiu tolu ne’e sei enfrenta programa foun eskola iha uma ba labarik sira iha suku no aldeia, tanba ne’e maka MEJD presiza divulga uluk informasaun ba autoridade munisipál tolu ne’e atu sira iha uluk koñesimentu hafoin mak informa ba administradór postu no autoridade lokál sira.
“Ita konsidera programa ne’e foun ba sira, tanba ne’e tenke halo preparasaun ida di’ak atu programa ne’e bele tama bá suku no aldeia sira iha munisipiu tolu no labele hasoru difikuldade”, diretór ne’e afirma ba Tatoli iha Vila Verde, kuarta ne’e.
Dirijente ne’e esplika katak importante liu maka presiza hetan dadus husi munisípiu tolu ne’e, liuliu suku no aldeia hira, sentru hira, depois maka foin loke prosesu inskrisaun ka rejistu ba labarik sira iha fatin refere. Bainhira kritériu sira ne’e konklui hotu ona maka MEJD foin loke prosesu rekrutamentu ba edukadór sira atu apoiu Programa Eskola iha Uma iha kada sentru sira.
“Baibain kada sentru ida ita sei koloka edukadór ka brigada na’in-rua, tanba ne’e depende ba sentru hira maka sei estabelese iha munisípiu tolu ne’e. Kuandu iha aldeia ida maka sentru tolu, ita sei koloka edukadór ka brigada na’in-neen”, katak.
Nia salienta liután katak aleinde munisípiu tolu ne’e sei kontinua mós iha Dili. “Kada munisípiu iha postu administrativu neen, maibé depende ba partisipasaun inan-aman sira nian atu lori oan sira tuir programa ne’e. Bainhira iha aldeia ida maka inan-aman sira iha interese, entaun bele kria sentru rua ka tolu”.
Orsamentu ba programa faze dahuluk iha 2022 MEJD aloka ba munisípiu Dili millaun $2,1 ho durasaun tempu fulan neen ho totál sentru 36 husi aldeia 222. Husi sentru 36 ekipa MEJD konsege rejista labarik hamutuk 1.074, maibé sira ne’ebé mak mai partisipa no hetan graduasaun iha de’it 659.
Ho kontinuasaun Programa Eskola iha Uma ne’ebé sei alarga tan bá munisípiu tolu ho apoiu orsamentu millaun $2-resin ne’e pretende hetan nia finalidade ida di’ak atu labarik sira ne’ebé la asesu ba edukasaun formál bele hetan hotu oportunidade.
Notísia relevante: Labarik 1.074 partisipa ona programa eskola iha uma
Jornalista: Tomé Amado
Editora: Maria Auxiliadora
