iklan

EDUKASAUN, BOBONARO, MUNISÍPIU

Konstrusaun sala tolu iha EBC Beremanu atinje 50%

Konstrusaun sala tolu iha EBC Beremanu atinje 50%

Projetu konstrusaun Eskolár iha Ensinu Báziku Sentrál (EBC) Beremanu, suku Tapo-Memo, postu administrativu Maliana, munisípiu Bobonaro. Imajen Tatoli/Sérgio da Cruz.

BOBONARO, 25 janeiru 2023 (TATOLI) – Implementasaun projetu konstrusaun sala aula foun tolu iha Ensinu Báziku Sentrál (EBC, sigla portugés) Beremanu, suku Tapo-Memo, postu administrativu Maliana, munisípiu Bobonaro, daudaun ne’e progresu fíziku atinje 50%.

Diretór EBC Beremanu, Jaco dos Santos, relata obra ne’e tama iha Projetu Konstrusaun no Reabilitasaun Infraestrutura Eskolár (PKRIE) 2022, ne’ebé hahú konstrusaun iha fulan-abríl tinan 2023 no daudaun ne’e iha ona faze atu monta besi baza kuda-kuda ba kakuluk.

Notísia relevante: Komandu F-FDTL hala’o asaun sosiál ba EBC Beremanu

“Implementasaun projetu ida-ne’ebá ne’e tama ona ba 50%, tanba Batako hada hotu ona, projetu ne’e la’o la atraza, tanba projetu sira legaliza iha loron ida de’it, ne’e foin maka eskola rua ona mak hasae’ ona, seluk seidauk, ne’ebé projetu komunitária ida-ne’e hatudu nia progresu diak,” nia koa’lia ho jornalista sira iha Beremau, kuarta ne’e.

Dirijente eskola ne’e konsidera ho estabelesimentu sala aula foun tolu ne’e sufisiente ona atu akumula estudante sira hosi terseiru siklu, partisipa iha prosesu ensinu no aprendizajen.

“Eskola ne’e iha turnu rua, ami agora iha sala hamutuk neen, sé ida-ne’e ba hotu ona, ensinu aprendisajen la’o hanesan bainbain. Ha’u foin fó hatene ba diretór servisu munisipál edukasaun katak, bainhira eskola foun ne’e di’ak ona, Governu se iha hanoin di’ak, ida-ne’e atu sai ba primeiru no segundu siklu, terseiru siklu maka ha’u atu muda ba leten, maibé tanba ita-nia situasaun hanesan ita atu halo nusá,” nia katak.

Enkuantu totál orsamentu ne’ebé gasta ba projetu konstrusaun eskola ne’e hamutuk $84,653.37, montante ne’e ne’e mai hosi orsamentu kategoria tranferénsia públika.

Notísia relevante: EBC Beremau menus profesór disiplina tolu

Jornalista: Sérgio da Cruz

Editór: Evaristo Soares Martins

iklan
iklan

Leave a Reply

iklan
error: Content is protected !!