Kazu sona profesora iha Atabae, PNTL kaptura ona suspeitu iha Lourba
BOBONARU, 06 Novembru 2026 (TATOLI) – Polísia Nasionál Timor-Leste (PNTL) Munisípiu Bobonaru kaptura ona suspeitu ba kazu sona profesora Martinha Liu Mali iha aldei Aidabaslala, suku Hataz, postu administrativu Atabae, pur volta tuku 03h00, sesta-feira ne’e.
Segundu Komandante Polísia Munisípiu Bobonaru, Superintendente Carlos Moniz Maia, relata katak suspeitu inisiál L ne’e hafoin sona profesora halai husi lokál krime no asegura husi Xefe Suku Lourba no OPS, hafoin Polísia Eskuadra Bobonaru bá foti nia.
Tuir nia esplikasaun, depois simu informasaun husi Xefe Suku Hataz, Polísia kontinua kedas bá Aidabaslala atu konfirma situasaun ho vítima. Maibé, bainhira to’o iha fatin, suspeitu haree Polísia no halai bá Lourba.
Tanba suspeitu iha família iha Lourba, Polísia halo perseguisaun to’o Maliana, maibé la konsege kaer nia. Depois, Polísia buka informasaun kona-ba identidade suspeitu nian no kontaktu Xefe Suku Lourba atu fó naran no karaterístika suspeitu nian.
Ho informasaun ne’e, Xefe Suku Lourba konsege identifika suspeitu no serbisu hamutuk ho Ofisiál Polísia Suku (OPS) Lourba atu asegura nia. Depois, Polísia orienta eskuadra Bobonaru atu bá foti suspeitu iha Lourba no lori bá detensaun iha Eskuadra Polísia Bobonaru.
Notísia relevante: PNTL Bobonaru rejista krime tolu durante finadu
Superintedente Carlos Moniz Maia subliña katak hafoin asegura suspeitu, nia orienta kedas ekipa Seksaun Investigasaun Komandu Munisípiu Bobonaru no ekipa Rezerva Intervensaun Rápida (RIR) hodi foti suspeitu no daudaun nentrega ona ba Komandu Eskuadra Polísia Atabae hodi submete ba prosesu identifikasaun.
“Kazu ne’e ha’u halo ona kontaktu ho Prokuradór Munisípiu Bobonaru, informa ona situasaun ba nia. Orientasaun katak halo tiha identifikasaun depois aprezenta bá Ministériu Públiku atu kontinua prosesu”, nia informa, ohin.
Tuir informasaun preliminária, ne’ebé PNTL rekolla, motivu husi kazu ne’e deskonfia suspeitu tama uma. “Nia orijen Atabae duni, más hola feto iha Lourba. Tanba loron finadu nia partisipa iha Atabae. Tuir informasaun provizória, ita deskonfia nia tama uma atu na’ok sasán. Nia sona vítima ne’e uza tezoura, kanek iha nia kotuk laran”, Segundu Komandante ne’e relata.
Diretór Servisu Munisipál Saúde, Autoridade Munisípiu Bobonaru, Cesaltino Maia, hatete katak hafoin akontesimentu vítima hetan kedas atendimentu saúde. “Ninia kondisaun di’ak hela, ladún grave. Daudaun profesora fila tiha ona bá uma”, nia dehan.
Relasiona ho akontesimentu ne’e Komandu Polísia Munisípiu Bobonaru husu ba komunidade sira iha aldeia 193, suku 50, postu administrativu neen katak molok atu toba kalan tenke kontrola uma, haree janela, taka metin odamatan, nune’e evita ema seluk hanoin aat halo asaun ruma.
Jornalista: Sergio da Cruz
Editora: Maria Auxiliadora
