PNTL Bobonaru rejista krime tolu durante finadu
BOBONARU, 04 Novembru 2026 (TATOLI) – Polísia Nasionál Timor-Leste (PNTL) Komandu Munisípiu Bobonaru rejista krime tolu durante komemorasaun finadu, ne’ebé akontese iha postu administrativu Kailaku, Maliana no Bobobaru.
Segundu Komandante Polísia Munisípiu Bobonaru, Superintendente Carlos Moniz Maia, hatetn katak antes tama ba selebrasaun finadu, PNTL halo ona reuniaun no operasaun show of force hamutuk ho Forsa Defeza Timor-Leste (F-FDTL), Batallaun Orden Públika kompaña Delta Soso no Unidade Patrullamentu Fronteira atu alerta komunidade kona-ba prevensaun krime no manutensaun orden públika durante finadu.
“Ita aviza ba komunidade atu labele hemu tua iha fatin públiku, labele tuur iha estrada durante kalan liu tuku 22:00, no ba sira ne’ebé halo viajen tenke kumpre lei no Kódigu Estrada, depo’is tama ba finadu ita rejista kazu tolu”, Carlos Moniz Maia informa ohin.
Kazu dahuluk akontese iha área Kailaku, insidente entre joven sira husi Samutaben no Asalau, iha dadeersán. Depois, iha tempu meudia, akontese fali konflitu entre joven sira husi suku rua ne’e, ne’ebé rezulta membru F-FDTL nia feen ida sofre kanek.
Kazu seluk akontese iha loron 02, iha semitériu jerál Suku Tapo-Memo, ne’ebé envolve joven ida no membru F-FDTL ida.
“Momentu ne’ebá membru husi husi Unidade Patrulamentu Fronteira mak asegura membru F-FDTL ne’e ho joven ida. Momentu ne’ebá ami entrega fali membru F-FDTL ne’e ba kompañia Tunubibi depois joven ne’e ami asegura iha ne’e hodi halo identifikasaun”, nia dehan.
Komandante ne’e mós salienta katak PNTL rejista mós kazu violénsia doméstika ida iha Saburai no kazu asaltu malu ida entre joven sira iha Bobonaru.
Kazu konflitu entre joven sira iha Samutaben no Asalau envolve grupu arte marsiál ne’ebé Governu bandu ona, enkuantu kazu iha Tapo-Memu akontese tanba konsumu bebida alkólika.
“Kuandu alku domina ita-nia isin, ita sente buat hotu-hotu di’ak, buat hotu-hotu badak, ita sente hanesa mesak mak moris iha mundu ne’e. Entaun, ita halo buat hotu-hotu tuir ita-nia hakarak, más ne’e hanesan akontesimentu ki’ikoan, la grave ida”, nia dehan.
Superitendente Carlos Moniz Maia realsa katak kazu sira ne’e tama iha kategoria krime semi-públiku, nune’e vítima sira presiza aprezenta keixa ba autoridade kompetente atu prosesu bele kontinua tuir prosedimentu legál.
“Depois simu keixa, ita rekolla informasaun, evidénsia hotu ita entrega ba Ministériu Públiku. Ba kazu sira ne’e, suspeitu sira ne’ebé ita konsege asegura halo kedas identifikasaun depois rejista nia prosesu”, nia dehan.
Iha parte seluk, nia konsidera katak falta konxiénsia no atitude arrogante iha komunidade sai hanesan dezafiu ba manutensaun dame no seguransa iha munisípiu Bobonaru.
Tanba ne’e, PNTL kontinua hala’o atividade sensibilizasaun liuhusi Polísia Komunitária, liuliu iha eskola no entre joven sira, atu hasa’e konxiénsia kona-ba importánsia respeita malu, kumpre lei no evita hahalok ne’ebé bele hamosu konflitu.
Nia apela ba komunidade Bobonaru no sidadaun sira ne’ebé mai husi munisípiu seluk atu hamutuk kria dame no seguransa. “Dame ne’e ita mak tenke kria husi ita-nia an rasik. Kuandu ita halo viajen, tenke kumpre regra Kódigu Estrada, lori dokumentu transporte no karta kondusaun, uza kapasete no evita uza kanu-resin ne’ebé bele perturba orden públika”, nia enfatiza.
Carlos Moniz Maia mós husu ba komunidade atu la depende de’it ba autoridade seguransa atu mantein dame, maibé kada sidadaun tenke iha responsabilidade atu respeita lei no kontribui ba estabilidade iha sosiedade.
Notísia relevante: PNTL Bobonaru destaka papél feto polísia iha hametin pás no seguransa
Jornalista: Sergio da Cruz
Editora: Maria Auxiliadora
