PNTL Bobonaru destaka papél feto polísia iha hametin pás no seguransa
BOBONARU, 13 Agostu 2026 (TATOLI)-Segundu Komandante PNTL Munisípiu Bobonaru, Superintendente Carlos Moniz Maia, afirma katak feto polísia asume papél importante iha hametin pás, seguransa no relasaun entre polísia no komunidade.
Carlos Moniz Maia hatete katak, atualmente, feto polísia iha Bobonaru hamutuk 35 no na’in-tolu lidera seksaun iha komandu munisípiu.
Nia hateten katak, aleinde iha dirijente feto tolu, iha mós na’in-hitu ne’ebé koloka iha pozisaun Ofisiál Polísia Suku (OPS) atu apoia ba rezolusaun konflitu no hametin seguransa iha komunidade.
Komandante ne’e subliña katak feto polísia sira mós envolve iha patrullamentu, investigasaun kriminál, atendimentu ba vítima violénsia doméstika, liuliu feto no labarik, no prevensaun violénsia bazeia ba jéneru.
“Prezensa feto iha servisu polísia bele fasilita vítima sira halo komunikasaun, liuliu ba vítima feto no labarik feto. Sira mós sai fonte importante entre polísia no komunidade”, dehan.
Superintendente ne’e esplika katak partisipasaun feto iha PNTL la’ós de’it atu aumenta númeru feto iha forsa polisiál, maibé mós atu garante igualdade no oportunidade ba feto atu dezenvolve kapasidade, envolve iha lideransa no foti desizaun iha área seguransa.
Nia hateten katak iha 2025 to’o 2026, seidauk iha mudansa signifikativa ba númeru feto polísia iha Bobonaru, tanba seidauk iha rekrutamentu no promosaun foun.
“Dezde 2025 to’o 2026, laiha mudansa signifikativa ba karreira feto polísia Bobonaru, tanba númeru la muda. Ami laiha rekrutamentu no iha tinan 2026 ne’e mós laiha promosaun” nia hatete.
Maski nune’e, PNTL Bobonaru kontinua tau formasaun ba feto polísia iha planu asaun anuál, inklui planu atu fó oportunidade ba formasaun iha rai-li’ur, bainhira orsamentu 2027 hetan aprovasaun husi Governu.
Antigu segundu komandante UPF ne’e realsa katak limitasaun orsamentu sai dezafiu ida ba partisipasaun feto polísia iha formasaun iha rai-li’ur, tanba komandu munisípiu 13 no unidade tolu presiza fahe orsamentu ba nesesidade formasaun.
Nia mós konsidera katak partisipasaun feto olísia importante atu implementa ajenda seguransa, inklui prinsípiu husi Rezolusaun Konsellu Seguransa Nasaun Unida 1325 kona-ba feto, pás no seguransa.
Hodi afirma katak kontinua fó oportunidade ba feto polísia atu dezenvolve kapasidade no asume pozisaun lideransa no sei ajuda hametin servisu polísia no relasaun ho komunidade.
Notísia relevante: PNTL Bobonaro: Bebé ne’ebé mate iha Maliana kauza hosi ema buti kakorok
Jornalista: Sergio da Cruz
Editora: Maria Auxiliadora
