Komandu F-FDTL hala’o asaun sosiál ba EBC Beremanu
BOBONARO, 24 janeiru 2024 (TATOLI) – Xefe Estadu Maiór Jenerál FALINTIL-Forsa Defeza Timor-Leste (F-FDTL), Tenente Jenerál Domingos Raúl ‘Falur Rate Laek’, kuarta ne’e hala’o asaun sosiál hanesan materiál didátika no materiál desportu ba estudante sira iha ensinu Báziku Sentrál (EBC, sigla portugés) Beremanu, suku Tapo-Memo, postu administrativu Maliana, munisípiu Bobonaro.
Atividade ne’e sei realiza mós ba eskola iha Altu Lebos, suku Gildapil, postu administrativu Lolotoe no sei kontinua ba munisípiu Covalima.
Apoia hirak-ne’ebé oferese ba estudante sira mak hanesan livru istória militár diáriu nian hosi Komdante sira hanesan Jenerál Taur Matan Ruak, Tenente Jenerál Reformadu Lere Anan Timur, Tenente Jenerál Falur Rate Laek no Jenerál Mau Nana.
Nune’e mós oferese lapizeira, kadernu, pasta, materiál desportu nian hanesan bola no saluk tán.
Falur Rate Laek, esplika, apoia ne’e hanesan asaun ki’ik ida-ne’ebé Forsa Armada halo ho domin ho objetivu reforsa iha edukasaun sidadania no investe maka’as ba iha espíritu nasionalizmu no patriotizmu estudante nian.
Notísia relevante: Xefe Estadu Maiór Jenerál F-FDTL apoia matérial didátika ba eskola haat iha Oé-Cusse
“Jenerál sira uluk governu sempre tinan-tinan aloka osan ba halo apoia sosiál, balu ba halo eskola, balu ba halo klínika, halo estrada, agora governu foun ne’e, halo fali lei ida dehan katak jenerál agora labele ba halo fali buat sira-ne’e eskola ne’e tanba ministeriu nia relevenate iha,” Tenente Jenerál Falur hateten iha intervensaun ba serimónia ne’e.
Kona-bá apoia materiál desportu, Falur subliña, asaun refere hanesan meiu ida atu investe iha área desportu, atubele hetan fini atleta futebolista, voleiból, basketból, Taekwondo no Karate nune’e reprezenta nasaun hamorin Timor nia naran iha mundu.
Falur apela ba estudante sira atu uza didi’ak livru no materiál hirak-ne’e nune’e ba futuru bele kontribui kapasidade ba dezenvolvimentu nasaun hodi hatutan prinsípiu ne’ebé eroi luta na’in sira hatuur katak liberta pátria no liberta povu.
“Imi bele sai eroi foun ba nasaun, labele ba fali buat ida arte-marsiál, ne’e ba deportu di’ak, ba fali volénsia ne’e lalika, ha’u husu inan aman sira atu investe maka’as edukasaun informál, hanorin ita-nia oan nune’e aban bainrua bele sai boot, sai ofisiál no jenerál,” Tenente Jenerál ne’e fó hanoin.
Diretór EBC Beremanu, Jaco dos Santos, orgulu no agradesse ba komandu F-FDTL, tanba hili eskola ne’e hetan apoia sosiál no promete utiliza sasan sira-ne’e hanorin estudante sira ho domin.
Enkuantu tuir dadus tinan letivu 2024, totál estudante iha EBC ne’e hamutuk 583-resin mai hosi primeiru siklui to’o terseiru siklu.
Notísia relevante: EBC Beremau menus profesór disiplina tolu
Jornalista: Sérgio da Cruz
Editór: Evaristo Soares Martins
