iklan

EDUKASAUN, BOBONARU, HEADLINE, MUNISÍPIU

EBC Beremau menus profesór disiplina tolu

EBC Beremau menus profesór disiplina tolu

Prosesu aprendizajen iha Ensinu Báziku Sentrál Beremanu, suku Tapo-Memo, postu administrativu Maliana, munisípiu Bobonaro. Imajen Tatoli/Sérgio da Cruz.

MALIANA, 16 junu 2023 (TATOLI) —  Ensinu báziku Sentrál (EBC, sigla portuges), suku Tapo-Memo, postu administrativu Maliana, munisípiu Bobonaro, daudaun ne’e enfrenta hela problema menus profesór disiplina tolu.

Diretór EBC Beremanu, Jacob dos Santos, hateten, daudaun ne’e iha eskola filiál haat iha totál profesór na’in-32, komposta hosi permanente na’in-17, kontratadu na’in-10, reklamadu na’in-haat no parsiál na’in-ida, enkuantu hosi numeru ne’e iha EBC Beremanu iha profesór na’in-tolu mak laiha.

Nia reforsa, iha tinan hirak liubá profesór disiplina ingles destaka ba apoia serbisu iha administrasaun munisipál Bobonaro, profesór siénsia fízika naturál mate tanba asidente iha Batugade no foin lalais ne’e profesora dalen tetun mos mate-tan ,inklui profesór ida mós koloka fali ba hanorin iha sekundária jerál Maliana.

Notísia relevante: Governu hatuur fatuk dahuluk ba konstrusaun eskola foun 82

“Ita-nia profesór, balu muda no balu mate, agora disiplina dalen tetun, siénsia fízika naturál no disiplina ida tán mak profesór laiha. Ida-ne’e mak difikuldade mai ami tanba iha ensinu terseiru siklu ne’e, profesór ida atu kaer matéria tolu ne’e susar tebes bainhira to’o halo pontu  ezame ne’e,” nia informa ba jornalista sira iha Maliana, iha kna’ar fatin, sesta ne’e.

Diretór Jacob informa, relasiona ho problema refere foin lalais ne’e dirijente eskola hamutuk ho gabinete diretiva buka ona soluasaun hodi muda fali profesór ida hosi segundu siklu atu prienxe fatin ne’ebé mamuk.

Alende ne’e iha tinan kotuk ne’e mos parte inan-aman foti desizaun tau osan kada estudante $8 hodi kontrata profesór parsiál ba disiplina ingles nian.

“Profesór língua ingleza nia ne’e, se karik sira la buka solusaun entaun tinan oin mai tanba iha ona lei katak labele hasai tán osan labarik sira-nian. Ida-ne’e mak difikuldade boot tanba língua ingleza ne’e matéria importante tebes ba nono ano iha terseiru siklu, agora inan-aman la selu ona ita atu foti osan iha ne’ebé,” nia katak.

Diretór EBC Beremanu rekomanda ba governu foun, liuliu Ministériu Edukasaun, Juventude no Desportu atu rektura graduadu Universidade Nasionál Timor Lorosa’e (UNTL) fakuldade Edukasaun Arte no Umanidade, liuliu sira ne’ebé iha área esensiál.

“Ita iha partidu hotu, maibé labele haree ba buat sira-ne’e, ita interese mak nasaun ne’e tenke matenek, tanba nasaun ne’e atu di’ak ba oin ne’e tenke ema matenek mak kaer,” Diretór ne’e katak.

Alende ne’e eskola ne’e mos enfreta hela problema menus kaderneta ba estudante primeiru no segundu siklu, tanba antes ne’e MEJD distribui kaderneta hamutuk 500-resin de’it.

“Ami seidauk fahe ida, tanba ami sura ba lato’o, maizumenus 500-resin mak la to’o, agora ami sei uza kaderneta ida uluk ne’e, ami rekomenda ba governu foun ne’e, se bele aselera lalais atu nune’e bele kabe lalais kadernenta ne’e totál alunu ne’ebé mak iha EBC ne’e, atu nune’e sira seluk labele hetan diskriminasaun,” dirijente eskola ne’e dehan.

Estudante eskola ne’e hahú hosi primeiru to’o nonu anu hamutuk 1,077 ho totál sala aula hitu, EBC Beremau mos iha eskola filiál haat, komposta hosi rua iha Tapo-Memo no rua seluk iha suku Saburai.

Notísia relevante: MEJD prevee millaun $2,4 hadi’a sala eskola 21 iha Bobonaro

Jornalista   : Sérgio da Cruz

Editór         : Evaristo Soares Martins

iklan
iklan

Leave a Reply

iklan
error: Content is protected !!