DILI, 04 fevereiru 2022 (TATOLI)–Ministériu Edukasaun Juventude no Desportu (MEJD) tinan ne’e sei hadi’a eskola 21 ho sala aula 76 iha munisípiu Bobonaro, ne’ebé tama iha projetu komunitáriu ho kustu hamutuk $2.409.512,03.
Tuir Diretór Servisu Edukasaun Bobonaro, Crispin Moniz, daudaun ne’e foin atu realiza projetu ba eskola rua.
“Tuir informasaun ne’ebé ha’u simu, ita iha eskola rua maka bele hahú ona prosesu konstrusaun Eskola Pré-Eskolár (EPE) Atu-Aben no Ensinu Sekundáriu Jerál (ESJ) Maliana, maibé eskola 19 seluk ha’u seidauk hetan informasaun,” Diretór informa ba Agência TATOLI, via telefónika, sesta ne’e.
Notísia relevante: Eskola 197 asina ona kontratu projetu komunitáriu hadi’a eskola
Tuir rekizitu eskola sira atu hahú prosesu iha faze dahaat, hahú hosi prosedimentu ba konstrusaun ne’e kada eskola sei foti uluk fundu 25%, hafoin kompleta tiha maka sei foti tan hodi bele kompleta to’o 100%.
Eskola 21 iha Bobonaro ne’ebé tama projetu komunitáriu mak hanesan EPE Atu-Aben, EPE Rita-bou, EPE Holsa, Ensinu Báziku Sentrál (EBC, sigla portugés) Gumer, EBC Hauba, Ensinu Báziku Filiál (EBF) Dilai, EBF Kota Boot, EBF Mazop, EBF Odelgomo, EBF Oplegul, EBF Boloi, EBF Cara-bau, EBF Ana-pal, EBF Maliubu, EBF Ferik Katuas, EBF Molop-Taz, EBF Opa Vila, EBF Halekou, EBF Rairobo, EBF Marco no ESJ Maliana.
Jornalista : Tomé Amado
Editora : Julia Chatarina
