MALIANA, 17 abríl 2023 (TATOLI) – Primeiru Ministru (PM), Taur Matan Ruak, akompaña hosi Ministru Edukasaun, Juventude no Desportu, Armindo Maia no Vise-Ministru, António Guterres, segunda ne’e hatuur fatuk dahuluk ba kontrusaun eskola foun hamutuk 82 sala aula 258 hosi totál eskola 117 iha nivél nasionál ba tinan fiskál 2023.
Serimónia ne’e simbolikamente iha Ensinu Bázika Sentrál (EBC, sigla portugés), Beremau, suku Tapo-Memo, postu administrativu Maliana, munisípiu Bobonaro ho totál sala aula tolu, ne’ebé sei gasta orsamentu $84,653,37.
Enkuantu obra ne’e fahe ba tipu rua komposta hosi Projetu Konstrusaun no Reabilitasaun Infraestrutura Eskolár (PKRIE) no kategória projetu kapitál dezenvolvimentu ho totál eskola 117 hosi orsamentu Jerál Estádu (OJE) tinan fiskál 2023 ho orsamentu millaun $15.
Primeiru Ministru, Taur Matan Ruak, sente kontente tanba mandatu governu ne’ebé nia lidera atu besik termina ona, hahú hosi 2021-2023 konsege dezenvolve eskola 400-resin iha territóriu nasionál.
Notísia relevante: PM Taur inaugura infraestrutura edukativa 59 iha Bobonaro
“Eskola sira halo iha 2023, kompleta infraestrura sira-ne’ebé presiza atu dezenvolve ita-nia oan sira no fatin ne’ebé dignu ba profesór sira, bainhira sira hanorin, tanba eskola barak laiha sala profesór, laiha laboratóriu, laiha casa de banho, laiha koziña,” nia katak.
Enkuantu totál PKRE tinan 2021-2022 ne’ebé governu implementa iha territóriu nasionál hamutuk 228, komposta hosi konstrusaun foun 218 hanesan sala aula 754, sala profesórr 93 no hariis-fatin 81. Enkauntu reabilitasaun hamutuk eskola 10, sala aula 57, sala profesór lima no hariis-fatin tolu.
Notísia relevante: MEJD-BNCTL realiza akordu transferénsia osan ba konstrusaun eskola 117
Jornalista : Sérgio da Cruz
Editór : Evaristo Soares Martins
