DILI, 11 abríl 2023 (TATOLI)–Minsitériu Edukasaun Juventude no Desportu (MEJD) hamutuk ho Banku Nasionál Komérsiu Timor-Leste (BNCTL) realiza tan akordu transferénsia osan ho montante millaun $15 atu uza ba dezenvolvimentu eskola hamutuk 117.
Programa ida-ne’e kontinuasaun hosi Programa Konstrusaun no Reabilitasaun Infraestrutura Edukativa (PKRIE) ba eskola sira iha territóriu laran tomak,
“Tinan 2023, Ministériu aloka tan millaun $15 ba dezenvolvimentu eskola iha territóriu nasionál. Ha’u espera asinatura akordu ne’e bele kontribui atu aselera progresu ezekusaun infraestrutura edukativa hamutuk 117 ne’e,” Ministru Armindo Maia hateten iha serimónia asinatura akordu ne’ebé realiza iha salaun MEJD, Vila Verde, tersa ne’e.
Nia hatutan, akordu kooperasaun ne’ebé MEJD halo ho BNCTL ne’e tanba konsidera nu’udar banku Estadu ida-ne’ebé bele jere orsamentu sira-ne’ebé atu apoiu ba infraestrutura edukativa ne’ebé mak MEJD sei kontinua realiza tan iha tinan ida-ne’e iha territóriu nasionál.
“Ida-ne’e laloos foin ba dahuluk, tinan kotuk mós ita asina akordu ida-ne’e ninia implementasaun ba infraestrutura edukativa sei la’o nafatin hela ho ninia orsamentu besik millaun $20. Ne’ebé, akordu hanesan ne’e ita kontinua hala’o nafatin,” nia dehan.
Kona-ba ezekusaun orsamentu 2023 nian, nia dehan, fó kompeténsia tomak ba Ministériu edukasaun projetu sira-ne’ebé mak la liu rihun $100, ninia prosesu verifikasaun la presiza haruka ona ba ADN tanba ne’e liuhosi akordu ho BNCTL bele aselera liután prosesu ezekusaun sira.
Reprezentante BNCTL, Alcino Monteiro, reforsa katak instituisaun bankária iha komitmentu kontinua apoiu programa estadu no Governu nian, tanba dezenvolvimentu infraestrutura edukativa ne’e konsidera importante duni atu investe ba rekursu umanu iha nasaun Timor-Leste.
PKRIE hahú realiza iha tinan 2021 ho objetivu ba dezenvolvimentu reabilitasaun fasilidade edukativa iha territóriu nasionál, ho nune’e MEJD ho BNCTL iha tinan kotuk asina ona akordu kooperasaun ba dezenvolvimentu infraestrutura edukativa 202 ho sala-de-aula hamutuk 657 ho ninia orsamentu kuaze rihun $20.
Jornalista : Tomé Amado
Editór : Cancio Ximenes
