Konstrusaun merkadu Mau-Mali nia progresu fíziku atinje 30%
BOBONARU, 06 Novembru 2026 (TATOLI) – Projetu konstrusaun merkadu Mau-Mali foin atinje progresu fíziku 30%, tanba impaktu husi presu simentu ne’ebé foin lalais sa’e.
Enjeñeiru empreza Lombel Unip., Lda., promete katak projetu ne’e sei atinje 60% iha Dezembru hodi kumpre alvu ne’ebé fó husi Autoridade Munisípiu Bobonaru.
“Agora hada hela batako no balu cor ona slop-riin, balu mós aterru ona rai. Foin lalais mak demora iha momentu simentu Tonasa laiha ne’e, maibé ami esforsu katak iha Dezembru bele atinje 60%, tanba materiál lokál no fabrikadu stock iha hela”, nia informa ohin.
Negosiante merkadu Mau-mali, Terezinha dos Santos, husu ba kompañia atu aselera serbisu, nune’e merkadu ne’e bele funsiona iha tinan oin.
“Ami sente fatin furak no luan ona. Tinan foun hotu ne’e ami bele fa’an ona, tanba antes merkadu ne’e halo, ema la mai basar mós ami fa’an ona iha ne’e”, nia dehan.
Projetu konstrusaun merkadu ne’e nia orsamentu mai husi Programa Dezenvolvimentu Integradu Munisipál (PDIM) tinan 2026 ho totál $437.063,83.
Notísia relevante: Konstrusaun merkadu Mau-Mali kontinua, prepara fatin foun ba negosiante 200-resin
Jornalista: Sergio da Cruz
Editora: Maria Auxiliadora
