Konstrusaun merkadu Mau-Mali kontinua, prepara fatin foun ba negosiante 200-resin

MALIANA, 31 Jullu 2026 (TATOLI) – Konstrusaun Merkadu Mau-Mali iha munisípiu Bobonaru daudaun tama on aba estapa fundamentál atu prepara infraestrutura komérsiu ne’ebé di’ak liután ba negosiante hamutuk 200-resin.

Projetu ne’e implementa husi empreza lokál Lobel Unipessoal Lda., ho objetivu atu prepara mellora kondisaun negósiu no dinamiza Natividad ekonómika iha Vila Maliana.

Daudaun, obra ne’e fizíka to’o ona faze monta estaka no kee-rai atu prepara fundamentu edifísiu. Merkadu foun ne’e sei iha pakote kuartu hamutuk 28, sintina sanul no hariis-fatin ualu. Antes ne’e, Governu mós konstrui ona uma haat ba fatin negósiu, kompleta ho muru protesaun.

Negosiante iha merkadu Mau-Mali, Lourença Motu, hatete katak projetu ne’e fó esperansa ba vendedór sira atu aumenta rendimentu, tanba merkadu foun sei atrai kompradór barak liután.

“Durante ne’e ami fa’an sasán kompradór menus tebes. Loron ida dalaruma ami hetan de’it besik $5. Ami fiar katak bainhira merkadu ne’e loke ona, ema barak sei mai n ami bele hetan rendimentu ne’ebé di’ak liután”, dehan.

Negosiante seluk, Santina dos Santos, realsa katak obra foun ne’e sei ajuda organiza atividade negósiu, tanba basar semanál iha merkadu Mau-Mali paradu ona besik tinan ida kauza husi falta kompradór.

“Ami na’in-haat de’it mak fa’an iha ne’e. Tanba ne’e, ami-nia rendimentu ki’ik, maibé ho merkadu foun ida-ne’e, ami espera sei rame liután, tanba negosiante sira husi merkadu sentrál Maliana sei muda mai. Ami espera bele hetan entre $15 to’o $20 loron ida”, katak.

Diretór Servisu Munisipál Jestaun Merkadu no Turizmu, Autoridade Munisípiu Bobonaru, Paulo dos Santos, salienta katak autoridade sei kompleta fasilidade sira ne’ebé seidauk iha antes halo atvidade negósiu iha merkadu ne’e.

Nia dehan, tuir lista ne’ebé prepara ona, negosiante hamutuk 20-resin ne’ebé agora fa’an iha merkadu sentrál Maliana sei muda hotu bá Merkadu Mau-Mali.

“Molok muda bá merkadu foun, ami sei halo sensibilizasaun kona-ba oinsá utiliza no rai-di’ak fasilidade merkadu. Depois mak ami koloka sira no aumenta mós jestór merkadu balun atu asegura jestaun ne’ebé di’ak”, dehan.

Tuir nia, transferénsia ne’e halo atu prepara espasu ne’ebé luan iha merkadu sentrál Maliana no permite simu atividade komérsiu seluk iha futuru. Ministériu Komérsiu no Industria mós iha planu atu dezenvolve fatin merkadu sentrál Maliana sai sentru komérsiu..

Notísia relevante: Negosiante Maliana husu tetu didi’ak bazár movel iha merkadu Mau-Mali no Soso

“Ami fiar katak merkadu Mau-Mali sei sai merkadu sentrál, tanba ita hakarak loke espasu Maliana Vila ne’e sai luan. Realidade agora iha konstrusaun edifísiu Sentru Solidariedade Sosiál, sei falta kazerna Polísia nia iha ne’ebá, edifísiu EDTL mós sei iha ne’ebá, tanba rai iha tiha ona”, nia dehan.

Projetu kontinuasaun konstrusaun merkadu Mau-Mali ne’e ezekuta tuir kontratu ho valór $437.063.83. Obra ne’e hahú iha loron 25 Juñu no no reviztu sei finaliza iha 25 Dezembru 2026, liuhusi Programa Dezenvolvimentu Integradu Munisipál (PDIM) 2026.

Notísia relevante: AMB presiza disponibIliza espasu komérsiu adekuadu iha merkadu Mau-Mali

Jornalista: Sergio da Cruz

Editora: Maria Auxiliadora