AMB presiza disponibIliza espasu komérsiu adekuadu iha merkadu Mau-Mali

BOBONARU, 21 Outubru 2025 (TATOLI)-Negosinte no komunidade sira husu Autoridade Munisípiu Bobonaru (AMB) atu disponibIliza espasu komersiu ne’ebé adekuadu, nune’e bele akumula hotu negosiante sira halo atividade ho di’ak no seguru.

Negosiante merkadu Maliana Joanico Pinto de Jesus dehan maski autoridade Bobonaru prepara ona infraestrutura balun, maibé seidauk bele responde ba nesesidade vendedór no kompradór sira-nia.

“Merkadu ne’e mak sai ona sentru. Se bee laiha, fatin fa’an la barak, oinsá mak atu akumula hotu negosiante sira? Ne’e ema butuk malu, fa’an sasán arbiru, halo uma-oan mós arbiru de’it maka merkadu sei la organizadu. Ezemplu hanesan foin lalais bazár semanál ne’e fa’an arbiru de’it, tanba fatin seidauk preparadu”, nia lamenta ba Tatoli, iha Maliana, ohin.

Iha sorin seluk, Rofino de Jesus nu’udar reprezentante komunidade Ritabou dehan komunidade hein katak merkadu ne’e bele loke hikas iha tempu badak. “Agora ita haree de’it muru sorin monu tih a ona,tanba ema ko’a ai besik iha ne’ebá. Maski kompañia ida halo aat ne’e prontu atu hadi’a fali, maibé ida-ne’e fó hanoin mai ita atu buka meiu para funsiona tiha merkadu ne’e. Se la’e hanesan uma ida karik harii tiha, na’in la hela fali”, dehan.

Hatán ba kestaun ne’e, Diretór Servisu Munisipál Jestaun Merkadu Autoridade Munisípiu Bobonaro, Paulo dos Santos, esplika konstrusaun Merkadu Mau-Mali sei halo fazeadamente no autorodade iha planu atu muda vendedór sira husi Merkadu Villa Maliana bá Mau-Mali bainhira konstrusaun ramata.

“Klaru katak tinan oin orsamentu 2026 prevee ona atu halo konstrusaun merkadu Mau-Mali. Agora ne’e ita konstrui ona maibé nia modelu ne’e meza. Ida-ne’e ba ita-nia komunidade sira fa’an modo, na’an ho ai-fuan sira, maibé sira ne’ebé fa’an roupa ne’e presiza kuartu-kuartu hanesan Dili nia ne’e. Tinan oin sei konstrui ida-ne’e depo’is buat hotu kompleta ona mak foin ita muda negosiante sira bá iha ne’ebá”, Paulo afirma.

Autoridade Munisípiu Bobonaru prevee ona rihun $294 iha Orsamentu Jerál Estádu tinan 2026 hodi kompleta instalasaun Merkadu Mau-Mali hanesan parte ida husi preparasaun ba dezlokasaun vendedór no ativasaun merkadu.

Notísia relevante: Komunidade husu AMB funsiona merkadu Soso

Jornalista: Sergio da Cruz

Editora:  Maria Auxiliadora