Komunidade husu AMB funsiona merkadu Soso
BOBONARU, 14 Outubru 2025 (TATOLI) –Komunidade sira preokupa no husu Autoridade Munisipál Bobonaru (AMB) atu funsiona atividade ekonómiku iha merkadu Soso Maliana tanba fatin ne’e abandonadu dezde konstrusaun ramata iha tinan-2019.
Komunidade hato’o ezijénsia ne’e tanba kondisaun atuál merkadu ne’e du’ut mak nakonu hale’u no laiha kontrolu husi governu.
“Ita-nia merkadu ida-ne’e tinan barak ona la uza. Ne’e, ita gasta osan Estadu saugati de’it tanba ne’e ami husu ba Autoridade Munisipál atu buka meius para funsiona tiha merkadu ne’e, nia razaun mak komunidade agora hela iha Soso ne’e barak depois iha Holsa, Odomau, Tunubibi Nunura. Se ita loke merkadu iha ne’e fatin ne’e sei rame no fasilita kompradór sira la’o besik liu,” Komunidade Soso, Santino Maia, informa ba Jornalista sira, iha Soso, tersa ne’e.
Komunidade Julio Lopes de Jesus reforsa, Autoridade Munisipál presiza tau-atensaun ba fatin ne’e tanba fasilidade balun hetan estragu no nakonu ho animál.
“Fatin ida-ne’e halo ba merkadu ka halo ba animál nia luhan tanba lorloron ami liu ba mai haree ema la fa’an modo, bibi mak toba nakonu iha merkadu laran ne’e. Ida-ne’e hanesan povu ami kestiona tanba ita halo obra ida só para gasta osan deit,nia benifisiu laiha,” komunidade ne’e lamenta.
Ba kestaun ne’e, Diretór Servisu Munisipál Jestaun Merkadu Autoridade Munisípiu Bobonaru, Paulo dos Santos, deklara katak Autoridade Munisipál iha ona planu atu funsiona merkadu ne’e.
“Ita-nia planu merkadu ne’e atu sai hanesan mós iha Mau-Mali maibé tuir ami-nia planu aban bainrua ne’e na’an, ikan sira mak fatin iha ne’ebá maibé depois mak ita haree tanba buat hotu bazeia ba orsamentu,” Paulo tenik.
Enkuantu Kapitál Maliana daudaun ne’e iha merkadu tolu hanesan merkadu sentrál Maliana, Mau-Mali no Soso.
Notisía relevante: https://tatoli.tl/2025/04/01/atividade-bazar-semanal-iha-merkadu-mau-mali-hahu-reativa-hafoin-paradu-2024/
Jornalista:Sergio da Cruz
Editór:Rafael Ximenes de A. Belo
