BOBONARU, 01 Abríl 2025 (TATOLI)—Autoridade Munisípál Bobonaru halo inaugurasaun ba merkadu Mau-Mali, suku Ritabou, postu administrativu Maliana iha 27 Fevereiru 2025, no hahú reativa atividade bazár semanál hafoin paradu iha 2024 ne’e.
Notísia Relevante: Merkadu Mau-Mali seidauk funsiona atu negosiante sira hala’o atividade negósiu
Negosiante, Santina de Jesús, hateten sira halo atividade negósiu bazeia ba orientasaun husi Autoridade Munisípiu Bobonaru no tuir oráriu bazár semanál sei akontese kada loron tersa iha kada semana.
“Ami faan ho ohin tan semana lima ona. Agora ami sente di’ak uitoan tanba moru iha ona, Bee-Moos iha ona. Problema mak ami iha ema faan barak, maibé ema sosa mak sei menús. Uluk liu, ba iha bazár sesta-sesta ne’e rame, tanba futu-manu iha, agora ne’e la barak,sasan mos ema hola la di’ak,” nia informa ba Agência TATOLI, iha merkadu Mau-Mali, tersa ne’e.
Santina dehan, vendedór sira-ne’ebé halo atividade negósiu iha bazár semanál ne’e mai husi postu administrativu Kailaku, suku Ritabou, Raifun, Lahomea, Holsa, Odomau inklui balun husi merkadu sentrál Maliana.
Negosiante sira-ne’e, nia hateten, maiória faan produtu lokál hanesan Modo-Tahan, ai-fuan, Roupa Obrál (OB) inklui materiál dapur nian.
Negosiante Delfina Pereira reforsa, durante semana lima ona reativa bazár semanál maibé menus kompradór, tanba ne’e nia husu ba Autoridade Munisípiu Bobonaru atu mobiliza negosiante husi merkadu sentrál Maliana kada tersa tenke konsentra hotu iha merkadu Mau-Mali.
“Agora ami faan semana haat liu on maibé la rame ida, ema mak hanesan ne’e no uitoan de’it. Modo-tahan de’it mós la sosa hotu tanba ema laiha. Se bele merkadu iha leten ne’e, loron bazár tersa ne’e taka tíha, haruka sira tun mai hotu iha ne’e para rame uitoan. Iha leten la faan ona kan hakarak lakhoi, ema mai hotu iha ne’e to’o lorokraik nian ne’e, pelumenus ema sosa netik modo futun ida ho rua hanesan ne’e,” nia dehan.
Ba kestaun ne’e, jornalista tenta komfirma ho diretór Servisu Munisipál Jestaun Merkadu no Turizmu, Paulo dos Santos, maibé la disponivél atu fó komentáriu tanba okupadu ho servisu seluk.
Antes ne’e, diretór ne’e mós hateten AMB sei tau iha planu Orsamentu 2026 atu kria tan kondisaun no aumenta fasilidade balun iha merkadu Mau-Mali, hafoin muda negosiante husi merkadu sentrál Maliana.
Tuir observasaun, Agência Tatoli nota katak Diresaun Servisu Munisipál Jestaun Merkadu no Turizmu koloka pesoál seguransa na’in-ida (1) iha merkadu Mau-Mali ho kontrola no asegura patrimóniu Estadu ne’ebé Governu hari ona.
Notísia Relevante: Bazár semanál iha merkadu Mau-Mali paradu
Jornalista : Sergio da Cruz
Editór : Cancio Ximenes
