BOBONARU, 10 fevereiru 2025 (TATOLI)—Diretór Servisu Munisipál Jestaun Merkadu, Autoridade Munisípiu Bobonaro, Paulo dos Santos, hateten iha tempu badak sei halo inaugurasaun ba merkadu Munisipál Bobonaro iha Mau-Mali, suku Ritabou, postu Maliana maibé seidauk bele funsiona atu negosiante sira hala’o atividade negósiu iha tinan 2025 ne’e, tanba presiza kria kondisaun no kompleta tan fasilidade balun.
Tuir loloos, nia dehan, halo ona inaugurasaun ba merkadu ne’e iha semana kotuk maibé la konsege no adi’a fali ba tempu seluk, hafoin Prezidente Autoridade Munisípiu Bobonaro ho ekipa sei partisipa reuníaun konabá ASEAN nian iha Provinsia Kupang, NTT, Indonezía.
Notísia Relevante: Autoridade Bobonaro sei kontinua hadi’a merkadu Mau-Mali iha 2025
“Orientasaun husi PAM sei kria lai kondisaun iha laran, tanba konstrusaun halo ne’e moru haleu ho nia elementu sira, ne’ebé inaugura tiha ita sei tau seguransa atu tau matan. Tinan ida-ne’e seidauk bele, tanba sei buka meiu kompleta lai hanesan ruku sira iha laran, kria lai kondisaun halo di’ak lai foin bele muda negosiante sira,” Nia informa ba jornalista sira iha Salaun Maria-Tapo, segunda ne’e
Antigu Administradór postu Balibo ne’e hateten, Prezidente Autoridade Munisípiu Bobonaro mós halo ona koordenasaun ho parseiru balun no tuir planu hafoin halo inaugurasaun, PAM ho Ajensía ne’e sei selebra mós kontratu atu halo konstrusaun uma ba negosiante sira hodi utiliza ba halo atividade negósiu.
Nia dehan, esforsu ne’e PAM Bobonaro ho ekipa halo hanesan faze preparasaun ba kondisaun minimu oinsá atu hasoru implementasaun polítika podér lokál no desentralisaun administrativa.
“Parseiru ne’e ba haree ona fatin ne’e, ema sei dezeñu. Ha’u fó ezemplu, halo hanesan Golgota Dili ne’e para aban-bainrua komunidade ne’e ita ense iha laran, depois sira selu ba estádu lokál tuir lei ne’ebé iha, la todan ida,” nia hateten.
Kona-ba asuntu atu koloka negosiante sira iha merkadu foun ne’e, Paulo dos Santos, esplika foin lalais ne’e ekipa sira rekolla ona lista jerál ida iha merkadu sentrál Maliana kuaze iha negosiante hamutuk 300-resin.
“Depois Mau-Mali ne’e justu ona ita atu monta negosiante sira. Ami sei haree fila-fali, tanba depois ida-ne’e lista ne’e sei fahe rua maibé ita sei tetu, sei bele ba hotu ka sorin de’it, ida-ne’e ita sei haree,” nia dehan.
Antes ne’e, negosiante sira iha merkadu Sentrál Maliana deklara sira-nia parte prontu koopera no kumpre desizaun muda ba merkadu Mau-Mali bainhira Autoridade Munisípiu Bobonaro kria ona kondisaun no fasilidade ne’ebé adekuadu.
Enkuantu, Autoridade Munisípiu Bobonaro liuhusi Orsamentu Planu Integradu Dezenvolvimentu Munisipál (PDIM) 2024 konstrui ona moru protesaun ho luan metru 400 no naruk metru 400, no obra ne’e ezekuta husi kompañia lokál Lesuburo Unipesoál, Lda, ho kustu $184,718.13.
Notísia Relevante: Negosiante sira hahú bazár semanál iha merkadu Mau-Mali
Jornalista : Sérgio da Cruz
Editór : Cancio Ximenes
