EKONOMIA, BOBONARO, HEADLINE, MUNISÍPIU

Autoridade Bobonaro sei kontinua hadi’a merkadu Mau-Mali iha 2025

Autoridade Bobonaro sei kontinua hadi’a merkadu Mau-Mali iha 2025

Negosiante sira halo hela atividade negósiu iha merkadu Mau-Mali, suku Ritabou, postu administrativu Maliana, munisípiu Bobonaro. Imajen Tatoli/Sérgio da Cruz.

BOBONARO, 05 juñu 2024 (TATOLI) – Autoridade Munisipál Bobonaro liuhusi Diresaun Servisu Munisipál Jestaun Merkadu no Turizmu, iha planu orsamentu tinan 2025, sei kontinua tau prioridade atu hadi’a merkadu Mau-Mali kona-ba instala fasilidade bee-moos hodi fasilita vendedór sira halo atividade negósiu ho di’ak no dignu.

Diretor Servisu Munisipál Jestaun Merkadu no Turizmu, Paulo dos Santos, esplika, governu lokál kontinua tau prioridade ne’e atu kria uluk kondisaun hafoin muda negosiante sira husi merkadu Maliana ba halo atividade negósiu permanente iha merkadu Mau-Mali, aldeia Samelaun, suku Ritabou.

Notísia relevante: Bazár semanál iha merkadu Mau-Mali paradu

“Fasilidade sira kompletu hotu tiha mak foin bele muda vendedór sira husi merkadu vila ba fali iha-ne’ebá, ne’e permanente, kona-ba atu muda bainhira ami seidauk hatetene, ita muda ne’e atu halo tata kota, ne’ebé planu ba oin ne’e atu konstrui merkadu ne’eba ne’e halo nusá, ne’e depois ita loke lai espasu vila ne’e halo luan, tanba iha-ne’ebá ne’e fatin luan la sukat ho ida-ne’e,” nia informa ba jornalista sira iha Maliana, kuarta ne’e.

Nia hatutan, foin lalais ne’e Diresaun Servisu Munisipál Jestaun Merkadu no Turizmu halo ona enkontru ho vendedór merkadu Maliana hodi partilla informasaun kona-ba planu muda ba merkadu permanente iha Mau-Mali.

Nia hatutan, ekipa jestaun merkadu mós daudaun sei rekolla dadus vendedór na’in hira mak atu muda ba merkadu Mau-Mali.

“Ami dehan lista tenke fó loloos, sé lae aban bainrua fahe mak balu la hetan fatin, dehan ami mak la fó fatin, ne’ebé dadus ne’e importante atu ami koloka fatin tuir lista ne’e,” nia hatutan.

Nia dehan, molok muda ba Mau-Mali Diresaun Servisu Munisipál Jestaun Merkadu sei halo jestaun oinsá negosiante sira utiliza merkadu Maliana sai moos no organizadu.

Kona-ba komunidade balun okupa espasu iha merkadu utiliza ba hela no hakiak animál livre, ekipa jestaun merkadu sira hahú ona halo aprosimasaun.

“Ita-nia merkadu ne’e fatin atu fila-liman, atu hela bele sai ba li’ur, tanba tuir regra ne’e labele, ita lori manu ho fahi ba hakiak iha-ne’ebá depois kria ambiente ladi’ak, halo merkadu sai buradu hotu,” nia hateten.

Enkuantu daudaun ne’e komapañia Lesuburo Unipesoál Lda halo hela konstrusaun moru protesaun ba merkadu Mau-Mali ho luan metru 400 no naruk metru 400 ho totál kustu $184,718.13. Obra ne’e implementa liuhusi Planu Dezenvolvimentu Integradu Munisipál (PDIM) tinan 2024.

Notísia relevante: Autoridade Bobonaro sei kria uluk kondisaun molok muda negosiante ba merkadu Mau-Mali

Jornalista: Sérgio da Cruz
Editór: Evaristo Soares Martins

iklan
iklan

Leave a Reply

iklan
error: Content is protected !!