Autoridade Bobonaro sei kria uluk kondisaun molok muda negosiante ba merkadu Mau-Mali
BOBONARO, 11 abril 2024 (TATOLI)-Autoridade Munisipál Bobonaro (AMB) liu hosi Diresaun Servisu Munisipál Jestaun Merkadu no Turizmu, sei kria uluk kondisaun dignu molok muda negosiante sira iha merkadu sentrál Maliana ba merkadu Mau-Mali, aldeia Samelau, suku Ritabou, Postu administrativu Maliana.
Planu atu muda negosiante sira iha merkadu Maliana ne’e hahú kedas iha mandatu Prezidente Autoridade Munisipal Bobonaro sesante, Ernesto de Oliveira Barreto, ho objetivu atu funsiona hikas atvidade ekonómika tanba merkadu referidu durante ne’e abandona.
Enkuantu Autoridade Munisipál Bobonaro sei halo reabilitasaun merkadu refere liuhosi projetu Peograma Dezenvolvimentu Intregradu Munisipál (PDIM) 2024 ho totál kustu istimasaun $200,000.00.
Notísia relevante: Negosiante sira hahú bazár semanál iha merkadu Mau-Mali
“Tempu badak ita prepara kondisaun dignu iha Mau-Mali, ita halo konstrusaun moru haleu atu nune’e muda ferik ho katuas sira iha merkadu Mau-Mali, agora fó tempu haloot sira-nia sasán neineik ba, tan merkadu ida leten ita hanoin ona atu hadi’ak munisípiu, se lae tinan ba tinan Bobonaro mak hanesan hela de’it,” Prezidente Autoridade Munisipál Bobonaro, Alexandrinoo Pires, informa ba jornalista sira iha Maliana.
Negosiante Merkadu Maliana, Santina Rica Mau, hateten nia parte la konkorda ho planu ne’e tanba kestun distánsia merkadu Mau-Mali dook, la seguru no sei afeta ba menus rendimentu.
“Sira-ne’ebé mai atu hola ami-nia modo hanesan eskola oan kost de’it, sira hola $0,25 de’it atu haksoit to’o Mau-Mali, saida mak sira hodi sa’e ojek,” negosiante ne’e preokupa.
Tuir nia, durante tinan barak ona halo atividade negósiu iha merkadu Maliana hetan rendimentu di’akliu, tanba merkadu atuál lokaliza kedas iha sentru kapitál munisipiu Bobonaro.
“Ami mate mos iha-ne’e atu ba Mau-Mali ho Soso ami la tuir, tanba ami bisnis ki’ik-o’an hanesan dudu ami ba Mau-Mali, ne’e imi asina halo Xina mak nakonu, maibé ami mós hakarak halo negósiu,” nia hateten.
Negosiante Domingas Bareto, hateten bainhira governu iha planu atu hadi’ak merkadu sentrál Maliana nia prontu muda, maibé atu halo negosiu permanente iha merkadu Mau-Mali nia sente todan oituan.
Tanba ne’e nia husu governu lokál atu tetu didi’ak molok foti desizaun, nune’e labele afeta ba negosiante sira-nia rendimentu no seguransa.
“Ita-nia boot sira dehan ami muda ba bazar sesta sesta de’it ne’e diak, ami halo tuir tanba ami ba faan iha Mau-Mali ne’e ami hanoin barak, apakah ema mai sosa ami-nia sasan ka lae, tanba merkadu ne’e dok hosi vila, halo nusá mak ema atu ba, neʼebé ami husu boot sira hanoin didi’ak lai,” nia tenik.
Enkuantu merkadu referidu konstrui iha tinan 2019 no nia funsionamentu paradu iha tinan 2021 hafoin akontese kazu omisídiu besik arreador merkadu Mau-Mali, maski nune’e iha tinan 2023 ne’e Autoridade Munisipál Bobonaro konsege re-ativa fali bazar semanál kada sesta, maibé la kleur paradu fali to’o agora.
Notísia relevante: Bazár semanál iha merkadu Mau-Mali paradu
Jornalista: Sérgio da Cruz
Editór: Evaristo Soares Martins
