BOBONARO, 13 fevereiru 2024 (TATOLI) – Atividade bazár semanál ne’ebé realiza kada sesta iha merkadu Mau-Mali, suku Ritabou, postu administrativu Maliana, munisípiu Bobonaro durante ne’e paradu hela.
Komunidade, Agustino Lopes Tavares, informa, negosiante sira la hala’o atividade negósiu dezde fulan-outubru 2023. Enkuantu merkadu refere autoridade lansa ba públiku iha fulan-marsu tinan 2023 liuba.
Notísia relevante: Negosiante sira sente la seguru halo negósiu iha merkadu Mau-Mali
“Uluk loke fofoun ne’e sesta-sesta ema barak, rame loos, agora bazár sesta-sesta ne’e laiha kleur ona, komunidade sira iha-ne’e ida ka rua mak sei mai fa’an pop mie, hudi, doxi, maibé ema mai barak sesta-sesta ne’e laiha ona,” nia informa ba Tatoli, iha Merkadu Mau-Mali, tersa ne’e.
Xefe suku Ritabou, Maximiano dos Santos Araújo, informa, asuntu refere nia parte hato’o ona ba Prezidente Autoridade Munisípiu Bobonaro no diretór sesante Diresaun Servisu Munisipál Jestaun Merkadu.
“To’o agora ita seidauk iha informasaun ne’ebé klaru atubele reativa fali atividade bazár, maibé ita-nia presizdente autoridade dehan, ba oin sei halo moru haleu, nune’e asegura liután merkadu ne’e ba futuru,.” Enkuantu merkadu Ma-Mali konstrui hosi governu anterior iha tinan 2019.
Notisia relevante: Negosiante sira hahú bazár semanál iha merkadu Mau-Mali
Jornalista: Sérgio da Cruz
Editór: Evaristo Soares Martins
