Negosiante sira sente la seguru halo negósiu iha merkadu Mau-Mali

BOBONARO, 15 marsu 2022 (TATOLI) – Nogosiante sira merkadu Mau-Mali ne’ebé lokaliza iha aldeia Samelaun, suku Ritabou, postu administrativu Maliana, munisípiu Bobonaro, sente la seguru halo atividade negósiu iha merkadu refere tanba dook hosi kapitál munisípiu.

Merkadu refere autoridade munisípiu Bobonaro hamutuk ho parseiru To’os ba Moris Diak (TOMAK) halo ona lansamentu iha loron 10 fulan-marsu ne’e.

 Notísia relevante: Merkadu Mau-Mali sei lansa ba públiku iha fulan oin

“Ami muda mai iha-ne’e ladún seguru, ladún kontente, tanba ne’e ami husu estadu sira tenke muda sira iha merkadu leten mai hotu iha-ne’e, razaun la’ós ami ta’uk ba buat ida seluk, laiha, maibé tanba iha Mau-Mali ne’e rai-fuik,” negosiante Esperança Soares, ko’alia iha merkadu Mau-Mali, kuarta ne’e.

Negosiante Santina dos Santos, rekomenda ba autoridade munisípiu Bobonaro atu tau planu iha Orsamentu Jerál Estádu (OGE) 2024 hodi konstrui postu polísia iha merkadu ne’e.

“Ami hakarak estadu tau seguransa iha-ne’e atu ami sira ferik ne’e fa’an labele sente ta’uk, seguransa iha hodi tau-matan ba ami, ami fa’an sasán mós faan ho kontente no labele ta’uk,” nia fó hanoin ba autoridade Bobonaro.

Komandante Polísia Munisípiu Bobonaro, Superintedente Antoninho Mauluta, esplika, komandu mós aprezenta ona planu seguransa ba autoridade Bobonaro no ba Ministériu Turizmu, Komérsiu no Indústria atubele konstrui postu polísia iha fatin ne’e hosi asegura funsionamentu merkadu refere.

Maibé nia parte hatún ona orientasaun ba parte operasaun no eskuadra Maliana no Cailaco hodi orienta Ofisiál Polisia Suku (OPS), suku Ritabou no Manapa atu halo patrullamentu no kontrola másimu iha árreadór merkadu refere, liuliu iha atividade bazár ne’ebé sei akontese kada semana.

“Ita mós oras ne’e daudaun ita-nia membru PNTL sira atu monitoriza iha-ne’ebá, sé de’it bainhira nia iha hanoin katak atu impede duni ba fatin ida-ne’e, ita halo atuasaun tuir lei ne’ebé iha depois ita lori prosesu ba oin,” nia afirma.

Diretór Servisu Jestaun Merkadu no Turizmu, Munisípiu Bobonaro, Henriquito Marques Leite, informa atividade bazár iha merkadu refere sei halo iha sesta, 18 marsu ne’e no sei kontinua loron hanesan kada semana bazea ba despaxu hosi prezidente autoridade munisípiu Bobonaro.

“Ha’u hakarak esklarese iha momentu ida-ne’e katak, la totalmente ita atu muda ita-nia negosiante merkadu sentrál ba Mau-Mali, maibé meiu ida-ne’ebé ita uza mak merkadu semanál ho razaun hanesan teste ida ba ita, depios ita la’o, konserteza ha’u garante katak ita-nia vendedór sira balu sei ba, depois ida-ne’e karik ba oin sira abitua ona ho ambiente merkadu Mau-Mali, neneik-neneik sei ba,” nia hateten.

Prezidente Autoridade Munisípiu Bobonaro, Ernesto de Oliveira, dehan urjentemente tenki uza merekda refere tanba estadu fakar osan barak durante tinan hirak ona mak merkadu ne’e la uza, entaun realiza bazár semanál.

“Se lae merkadu ne’e estraga de’it ona, entaun ho hanoin ida-ne’e maski la uza, maibé sesta-feira ne’e obrigatoriumente hotu-hotu tenke iha-ne’ebá halo movimentu iha-ne’ebá to’o 5 ka 6 oras para,” Prezidente autoridade munisípiu dehan.

Nia parte konsidera preukupasaun hirak-ne’e no sei koko atu tau iha planu prioridade ba tinan fiskál 2024 nian.

“Ita teke prepara kondisaun mak, primeiru tenke halo moru fó rai ektare hira ne’ebá lai, sei tau mos postu polísia ida hosi leten no kraik, atu nune’e kalan negosiante sira fila hotu, taka portaun kontrola ne’e fasil,” nia dehan.

Tuir observasaun Agênsia TATOLI iha terrenu nota katak, bee-moos haris fatin autoridade munisípiu instala hotu ona no ambiente mós, maibé eletrsidade la funsiona ho di’ak, tanba lampu sira-ne’ebé antes ne’e instala aat ona.

Daudaun ne’e iha negosiante na’in-rua mak fa’an hela produtu lokál hanesan; hudi, ai-dila, fehuk, ai-manas, modo-tahan no sasan nesesidade seluk tan.

Notísia relevante:Autoridade Bobonaro hatama ona merkadu Mau-Mali iha PDIM 2023

Jornalista   : Sérgio da Cruz

Editór          : Evaristo Soares Martins