Merkadu Mau-Mali sei lansa ba públiku iha fulan oin
BOBONARO, 23 fevereiru 2023 (TATOLI- Merkadu Mau-Mali ne’ebé lokaliza iha aldeia Samelaun, suku Ritabou, postu administrativu Maliana, munisípiu Bobonaro, sei lansa iha loron 10 fulan-marsu tinan 2023.
Diretór Jestaun Merkadu no Turizmu iha munisípiu Bobonaro, Henriquito Marques Leite, esplika merkadu refere kontrui hosi governu anteriór iha tinan 2019, maibé iha fulan juñu 2021 akontese kazu ofensa integridade agravadu ne’ebé hamate matebian Costódio de Fátima Pascoa, negosiante sira abandona to’o agora.
Notísia relevante: Autoridade Bobonaro hatama ona merkadu Mau-Mali iha PDIM 2023
“Hua hakarak informa katak data ita halo lansamentu bazea ba rezultadu enkontru ne’ebé ami halo sei akontese iha dia 10 oin mai,” nia hateten asuntu ne’e iha reuniaun Konsellu Koordenasaun Munisipál faze dahuluk tinan 2023 ne’ebé realiza iha salaun administrasaun Bobonaro, kinta ne’e.
Nia haktuir, planu reativa merkadu ne’ebé kosidera abandonadu ne’e liuhosi enkontru lubuk ida-ne’ebé fasilita hosi ajénsia To’os ba Moris Diak (TOMAK) ne’ebé envolve diresaun servisu sira ne’ebé interligadu atu hato’o opinaun kona-bá funsiomentu atividade ekonomia.
Nia fundamenta, programa ne’ebé trasa iha ámbitu lansamentu ne’e mak, realiza feira produtu lokál hodi fó oportunidade ba negosiante sira atu faan produtu ne’ebé mak sira produz rasik, inklui sei halo mós lansamentu ba asosisaun vendedór ne’ebé mak forma ona.
“Ha’u hakarak rekomnda ba meza, karik iha posiblidade orienta hela ita-nia funsionáriu tomak iha munisípiu Bobonaro ne’e karik iha tempu iha loron sesta ne’e ita ba halo limpeza,” nia hatutan.
Sekrretáriu Autoridade Munisípiu Bobonaro, João de Fátima do Carmo, sente kotente no agradese rona informasaun ne’e tanba merkadu refere abandona besik tinan rua ona, nune’e sei orienta parte relevante atu halo limpeza iha arreadór merkadu Mau-Mali.
“Ita iha traballadórr ne’ebé ita kontratu, liuliu ba saneamentu inklui kada suku sira oiha ita programa PMOPA no programa sira seluk ne’ebé iha pesoál sira atu halo limpeza ne’ebé jestaun fila fali ba Servisu Munisipál Agua no Saneamentu no Ambiente (SMASA) atu haree buat sira-ne’e,” nia hateten.
Enkuantu antes antes ne’e autoridade munisípiu Bobonaro prevee ona orsamentu hodi hadi’ak fasilidade sira-ne’ebé hetan estragu inklui konstrui moru protesaun iha tinan ne’e liuhosi Programa Dezenvolvimentu Integradu Munisipál (PDIM).
Notísia relevante: Negosiante Maliana husu tetu didi’ak bazár movel iha merkadu Mau-Mali no Soso
Jornalista: Sérgio da Cruz
Editór: Evaristo Soares Martins
