DILI, 03 Fevereiru 2025 (TATOLI) – Embaixadór Plan Internasionál Timor-Leste, Kay Olok Gusmão ho nia ekipa hasoru malu ho Primeiru-Ministru, Xanana Gusmão, hodi aprezenta programa ne’ebé hala’o ona iha Timor-Leste.
Diretora Interina Plan Internasionál Timor-Leste, Fátima Estrela Soares, hateten sorumutu ne’e fahe kona-ba atividade saida mak durante ne’e Plan hala’o ona iha Timor-Leste no ida-ne’e mós hasoru malu dahuluk nian dezde Plan Internasionál hala’o serbisu iha país.
“Ami relata ba primeiru-ministru kona-ba programa sira ne’ebé durante ami halo hanesan dezenvolvimentu iha komunidade, direitu labarik, nomós foinsa’e sira”, Fátima Estrela Soares hateten iha Palásiu Governu, ohin.
Aleinde hato’o programa sira, Plan mós husu xefe Governu nia apoiu ba atividade organizasaun nian. “Ami mós ohin relata ba primeiru-ministru kona-ba mandatu Kay Olok hanesan embaixadór ba Plan Internasionál [ne’ebé] komplete tinan ona. Primeiru-ministru husu Kay Olok kontinua serbisu iha Plan Internasionál ba tinan tolu tan hodi dezenvolve planu estratéjiku ba tinan tolu hodi aliña ho prioridade Governu nian, oinsá haree partisipasaun foinsa’e sira”, nia adianta.
Diretora interina ne’e haktuir katak, iha enkontru ohin ne’e, xefe Ezekutivu mós rekomenda ba Plan Internasionál atu kontinua programa sira ne’ebé iha ona, liuliu foinsa’e sira-nia partisipasaun ativa ba iha prosesu dezenvolvimentu hahú husi komunidade no diskute barak liu iha área foinsa’e sira hodi haree ba asuntu morál, mudansa atitude atu hanoin krítiku liután ne’ebé bele mai ho solusaun estratéjika ba Governu hodi haree ba futuru.
“Ba oin, ami sei haree planu ne’e, tanba primeiru-ministru husu ami atu lori mai aprezenta ba Konsellu Ministru hodi haree oinsá Plan Internasionál serbisu hamutuk ba direitu labarik no joven tomak iha Timór”, nia informa.
Fátima Estrela afirma katak ho embaixadór Kay Olok nia mandatu ne’ebé aumenta tan ba tinan tolu ne’e sei haree Plan nia programa boot neen mak empoderamentu foinsa’e feto iha polítika, empoderamentu feto no seluk tan.
Nia akresenta katak ba iha programa empoderamentu foinsa’e feto iha polítika ne’e importente tebes, tanba iha mundu joven sira ne’ebé asume kargu iha Parlamentu hanesan deputadu ne’e kuaze idade menus husi 30 ne’e la barak.
Tanba ne’e, hamutuk ho emabaixadór Kay Olok oinsá serbisu hamutuk atu haree ba asuntu ne’e, tanba Plan Internasionál nia observasaun katak joven sira agora ne’e espresa sira-nia hanoin liuhusi movimentu foinsa’e sira no organizasaun sira ne’ebé iha.
“Ita hamutuk ho Eembaixadór Kay Olok oinsá haforsa individuál no haforsa joven sira ne’ebé hola parte iha organizasaun atu organiza sira bele iha kapasidade analítika, komunikasaun no oinsá joven sira bele hola parte iha dezenvolvimentu, hadook aan husi konflitu. Tanba ne’e sai modelu ba labarik sira atu iha komunikasaun ne’ebé efetivu liu no oinsá hatene rezolve problema no transforma konflitu ho meiu ne’ebé diferente”, nia esplika.
Kona-ba direitu ba labarik no joven sira-nia, primeiru-ministru husu Plan Internasionál haree didi’ak asuntu ne’e, tanba Plan nia estudu hatudu katak kaben sedu no isin-rua sedu ne’e nia númeru sei aas iha Timór, entaun ida ne’e risku boot ba nasaun.
“Nune’e, primeiru-ministru husu ami atu haree asuntu ida ne’e sai prioridade ida mós oinsá labarik hotu eskola tenke akaba, nia eskola hahú husi sekundária to’o universidade. Ami mós haree ba empoderamentu ekonómiku iha baze, nomós área sira seluk, liuliu ami-nia serbisu boot ida mak kona-ba protesaun husi violénsia ba labarik sira”, nia salienta.
Mensajen husi xefe Governu mak husu Plan atu prepara planu ne’ebé estratéjiku liu ho aprosimasaun ne’ebé iha atu haree oinsá tulun Governu no serbisu hamutuk ho liña ministeriál sira ne’ebé relevante ba direitu labarik no foinsa’e sira.
Tanba Plan Internasionál nia rekursu umanu falta maka serbisu ne’ebé halo foin kobre ba munisípiu sira hanesan Aileu, Ainaro no Manufahi, maibé Plan mós koopera ho rede sosiedade sivíl sira iha munisípiu hotu hodi implementa projetu Plan Internasionál nian.
Jornalista: Arminda Fonseca
Editora: Maria Auxiliadora
