MALIANA, 09 Jullu 2026 (TATOLI) – Komunidade iha postu administrativu Kailaku, munisípiu Bobonaru, husu ba Governu atu halo intervensaun lalais ba ponte Bulobu ne’ebé kotu ona durante fulan tolu, tanba kontinua prejudika movimentasaun povu, transporte, atividade ekonómika, edukasaun no servisu saúde.
Xefe Suku Manapa, Jeferino Loco Bere, hatete katak Ministériu Obra Públika uluk informa ona katak empreza BTK halo tiha ona levantamentu no sukat ponte atu prepara implementasaun projetu, maibé to’o agora, tempu bailoron ona mós seidauk iha obra ruma hahú.
“Bailoro no tempu udan komunidade no transporte hotu tenki hakur mota Bulobu. Ida-ne’e sai difikuldade boot mai ami povu. Ami husu Governu tenke toma atensaun, labele to’o udan mak mai halo, ne’e ita hanesan soe osan de’it. Tanba dadersán ita-book, loraik udan mai sobu, tanba bee boot”, nia dehan ba jornalista sira, ohin.
Husi sorin seluk, joven Kailaku, Cristiliano do Rosário, dehan ponte Bulobu mak dalan prinsipál ne’ebé komunidade uza atu asesu bá Maliana no lori produtu agríkola bá merkadu.
Nia subliña katak durante ne’e movimentasaun transporte no ema liuhusi mota-laran tanba ponte Bulobu kotu.
“Ponte ne’e úniku dalan ida ne’ebé povu Kailaku tomak kuaze asesu. Se kotu hanesan ne’e oinsá mak sira bele transporta sira-nia produtu bá merkadu. Ponte ne’e kotu beibeik, entaun tempu bailoro ami tenke obriga hakat-mota, kuandu udan risku tebes mai ami komunidade kailaku nia vida”, salienta.
Nia aumenta katak estudante sira mós sai vítima husi situasaun ne’e tanba balun labele bá eskola bainhira mota sa’e no dalan taka.
“Dalaruma udan, estudante atu bá eskola la di’ak, prejudika sira tenke falta. Tanba mota boot dalaruma bele to’o semana, se estudante sira husi Dili presiza urjentemente halo dokumentu mai iha Kailaku mós susar”, nia realsa.
Xefe Sentru Saúde Kailaku, Lourenço Lopes, informa katak transporta pasiente ho emerjénsia mós sai difísil tanba ambulánsia labele asesu direta bá komunidade.
“Bainhira inan isin-rua atu partus, sira ne’ebé mai ho moras kardiolojia, ataka atu lori bá Dili mós la di’ak. Ami buka meiu hulan tiha ema ne’e ba mota-sorin mak ambulánsia husi Maliana nian mai foti lori bá ospitál atu hetan atendimentu espesifiku”, nia relata.
Notísia relevante: Ponte Bulobu iha Kailaku kotu filafali
Komunidade Kailaku espera Governu implementa lalais projetu konstrusaun ponte Bulobu atu garante asesu seguru bá transporte, atividade ekonomia, edukasaun no servisu saúde antes tempu udan.
Iha momentu ponte ne’e kotu, Ministru Obra Públika, Samuel Marçal, ho ekipa téknika halo kedas observasaun no foti kedas dadus.
Notísia relevante: MOP: Tékniku sira tenke halo levantamentu dadus molok reabilita Ponte Bulobu
Jornalista: Sergio da Cruz
Editora: Maria Auxiliadora
