DILI, 30 Marsu 2026 (TATOLI)—Ministru Obra Públika, Samuel Marçal, hateten tékniku sira tenke halo levantamentu dadus molok atu reabilita ponte Bulobu iha área Samutaben ne’ebé lokaliza iha Postu Administrativu Kailaku, Munisípiu Bobonaru.
Notísia Relevante: Ponte Bulobu kotu difikulta estudante 50 labele asesu bá edukasaun
Nia informa, ponte Bulobu Kailaku ekipa IGEADI halo atendimentu temporária ba asesibilidade transporte, entaun ekipa sira mobiliza ona ekipamentu preventivashanesan kontentór lima, maske loos duni foin dadaduk IGEADI normaliza ona.
“Ponte ne’e ita tenke hadi’a duni, maibé hadi’a ne’e la’ós loron ida ka rua, enkuantu kondisaun uda moos boot no mota tuun maka’as bele sobu fali ponte. Entaun presiza halo levantamentu dadus no haree mós ba kondisaun klima molok reabilita,” Ministru Samuel hateten ba Agência Tatoli liuhusi telefónika, ohin.
Aleinde ne’e, nia hatutan, kona-ba kondisaun ponte Atelari ho Lavateri iha Baukau ne’e kotu dunia, tanba ne’e nia orienta ona IGEADI ba ateru temporariamente hodi fasilita movimentasaun transporte.
Kona-ba ponte rua ne’e, nai dehan, dadaun ne’e Governu prepara fali dezeñu ba konstrusaun permanente inklui hadi’a dala ida ba estrada Mehara-Lautein nian.
“Importante mak agora ne’e IGEADI halo normalizasaun emerjénsia hodi asesu temporária,” nia dehan.
Entretantu, antes ne’e iha loron 27 fulan-Janeiru, Prezidente IGEADI, Ana Paula da Cruz, dehan ekipa tun terrenu hodi identifika mákina no ekipamentu saida mak presiza uza ba halo normalizasaun ba ponte ne’e.
“Tanba ida-ne’e ita konsidera hanesan emerjénsia, nune’e bainhira dadus iha ona ha’u-nia liman, ha’u sei orienta ekipa brigada destakadu Bobonaru tun hodi halo asaun preventiva ba ponte ne’ebé atu kotu,” nia dehan.
Nia sei hato’o mós informasaun ba Ministériu Obra Públika atu haree asuntu ida-ne’e, tanba IGEADI halo ona normalizasaun dala-rua, maibé kondisaun ponte kontinua aat, nune’e presiza iha solusaun permanente ida atu ponte labele kotu.
Notísia Relevante: MOP monta kontentór lima hodi normaliza ponte Bulobu
Jornalista : Alexandra da Costa
Editór : Cancio Ximenes
