KOVALIMA, 14 fevereiru 2025 (TATOLI) – Eskola Bázika Filiál (EBF) ne’ebé konstrui liuhusi Projetu Planu Dezenvolvimentu Integradu Munisipál (PDIM), iha Suku Matai, Postu administrativu Maukatar, seidauk utiliza ba atividade ensinu-aprendijazen uza tanba sei mamuk.
Manorin EBF Matai , Cancio Agusto de Jesus esplika katak, Eskola EBF Matai konstrui liuhusi projetu PDIM ho nia sala-de-aula haat maibé seidauk iha mobiliáriu eskolár.
“Ami seidauk bele uza eskola ne’ebé mak foin konstrui tanba seidauk iha meza no kadeira. Se bainhira ami uza, alunu sira atu tuur iha ne’ebé?”, Cancio Agusto de Jesus kestiona iha entrevista ho TATOLI iha Matai, ohin.
Eskola Bázika Filiál Matai, entrega ona iha dezembru tinan-2024, maibé to’o ohin loron seidauk uza, tanba presiza kadeira no meza nune’e alunu sira tuur hodi tuir prosesu apendizajen ho seguru.
EBF Matai aleinde la iha meza no kadeira, eskola mós hasoru difikuldade la asesu bee-moos durante tinan naruk nune’e eskola uza osan konsensaun eskolár sosa pulsa eletrisidade ense viziñu ne’ebé mak iha bee bomba hodi ense tanke toilet.
Kona-ba problema bee-moos, estabeleseimentu ensinu ne’e hato’o ona pedidu ba Servisu Edukasaun munisípiu Kovalima maibé to’o ohin loron seidauk iha rezultadu.
Tuir dadus alunu iha EBF Matai hamutuk 346 no totál profesór hamutuk na’in-11.
Diretór PDIM Kovalima, Carlito dos Reis Barros, rekõnese, bazeia matadalan empreza reponsabiliza de’it halo konstrusaun eskola maibé la haree ba mobiliáriu sira hanesan kadeira no meza tanba la hakerek iha matadalan implementasaun projetu PDIM.
“Tuir matadalan PDIM kona-ba edukasaun la iha matadalan atu sosa mobiliáriu eskolár bainhira atu kompleta, ita presiza halo dezeñu foun; edukasaun mak bele hatene”, nia esplika.
EBF Matai lokaliza iha Suku Matai, postu Maukatar ne’ebé konstrui husi empreza Feto Lima ho verba orsamentu $ 87,931.39 ho nia kustu kontratu $ 76,921.36 empreza hahú konstrui iha agostu 2024 entrega iha dezembru 2024.
Jornalista:Celestina Teles
Editór :Rafael Ximenes de A Belo
