DILI, 19 Maiu 2025 (TATOLI)— Diretór FONGTIL, Valentim da Costa Pinto husu ba lider politika sira atu iha unidu nia laran hodi lori Timor-Leste sai diak liu tan iha futuru.
Mensajen ne’ebé Diretór FONGTIL, Valentim fo sai ne’e relasiona ho Loron Restaurasaun Independénsia ba dala – 23 ne’ebé sei komemora iha loron 20 Maiu 2025 ne’e.
“Ita kontinua husu ba ita nia ukun nain sira, no ba ita nia lider politika sira ne’ebe iha, hau hanoin tempu ona atu unidu. Katak, unidu iha asaun, demokrasia, permite atu iha diferensia ideas, maibe tenki hanoin ona, saida mak ita tenki hamutuk para bele ultrapassa iha situasaun sira ne’e hodi lori Timor ba oin ho diak no ita bele fo kondisaun diak ba ita nia povu,” hateten Diretór FONGTIL, Valentim da Costa Pinto ba Tatoli.
Tuir Diretór Valentim nia hare katak, unidade mai husi ukun nain hodi nune’e lider sira tenki metin hare katak Timor – Leste tenki ultrapassa situasaun sira hamutuk ho diak liu.
“Ba tinan ida ne’e ita kompleta tinan 23 ba ita ninia restaurasaun independensia ne’ebe ita halo buat barak, maibe ita hare mos ita nafatin dezafiu lubuk ida ne’ebe ita presija ultrapasa iha tinan hira mai oin,” nia relata.
Nia hatutan tan katak, durante observasaun FONGTIL durante tinan 23 husi perspetivas direitos humanus, estadu no governu halo esforsu maka’as atu valoriza direitu sidadaun nian.
“Ita nia estadu ratifika ona konvensaun direitus humanus, direitu sidadaun ninian iha mundu, liu-liu ba direitu sosial ekonomia, politika kultura, direitu feto, labarik no direitu ba ema ho difisiensia, ne’ebé kuaze ita ratifika ona. Ne’e atu hatudu estadu Timor-Leste ninian komitmentu hodi promove kondisaun diak ba ninia sidadaun sira tuir prinsipiu direitus humanus ninian,” nia hatete.
Nia dehan ho komemorasaun loron Restaurasaun Independénsia ne’e estadu ne’e seidauk hakonu sidadaun sira ninia direitu ba area saude, edukasaun, ekonomia no seluk tan. “ Tanba ne’e, ita iha situasaun ida ne’ebe ita kontinua dezafia ita nia governu para bele halo diak liu tan,” nia deklara.
Ho nune’e nia husu atu governu fo atensaun ba infranstruktura iha baziku hanesan Estrada, telekomunikasaun, bee ho saneamentu nomos eletrisidade. Tanba, buat hirak ne’e bele halo sidadaun sira sente ambiente ukun rasik an.
Jornalista : Mirandolina Barros Soares
Editora : Armandina Moniz
