DILI, 23 Maiu 2025 (TATOLI)—Sekretaria Estadu Terra no Propriedade (SETP) hahú orienta ekipa tékniku husi Diresaun Jerál Terra no Propriedade atu hahú halo levantamentu ba rai Estadu nune’e bele halo identifikasaun rai hira mak tama ba área Estadu no hira mak domíniu privadu.
Levantamentu ne’e, Sekretaria Estadu relevante sei hahú iha Dili no sei to’o mós iha munisípiu sira.
“Liuliu iha Dili ne’e, ita bele haree uma ne’ebé Indonézia husik, ne’ebé oras ne’e okupa husi populasaun, iha tempu badak ami sei regulariza. Ami sei halo ida-ne’e hahú husi Bairru-Pité, Dili,” Sekretáriu Estadu Terra no Propriedade, Jaime Xavier, hateten ba jornalista sira iha Ministériu Justisa, Kolmera, sesta ne’e.
Nia dehan, tuir dadus ne’ebé Governu foti ona ba área sira-ne’ebé mak identifikadu rai Estadu ne’e hahú husi Metiaut to’o areia branka, maski balun hateten iha surat nu’udár na’in ba rai iha área referida. Governu hakarak liberta atu hadi’a fatin ne’e sai di’ak hanesan nasaun seluk.
Nia hatutan, iha área Ministériu Finansa nian, Aitarak-Laran, ne’e rai ne’ebé mak komunidade okupa maioria Estadu nian, nune’e tempu badak ekipa Terra no Propriedade sei tun ba halo levantamentu hodi ko’alia ho komunidade atubele husik fatin ne’e atu instala instituisaun balun iha-ne’ebá tanba rai Estadu iha Dili laiha ona.
Jaime hateten, kona-ba abitasaun (perumahaan) Indonezia nian ne’ebé daudaun sidadaun sira okupa hanesan Perumnas Bairru-Pite, Osindo, Surikmas, Delta no iha fatin seluk tan iha Timor laran tomak, sei regularizadu hodi hasa’e reseita Estadu.
“Tanba agora ne’e reseita ba arrendamentu rai no uma Estadu ne’e iha tinan 2024 hatama millaun haat ba kofre Estadu no husi 2025, Janeiru to’o mai Marsu, reseita husi arrendamentu rai no uma Estadu iha millaun $1,300,” nia afirma.
Nia husu ba komunidade liuliu sira-ne’ebé hela iha uma no rai Estadu tenke selu arrendamentu ba Estadu nune’e bele hasa’e reseita doméstika.
Jornalista: Natalino Costa
Editór: Xisto Freitas da Piedade
