Governu garante empréstimu ba infraestrutura la ameasa futuru nasaun
DILI, 01 Outubru 2025 (TATOLI) – Ministru Obra Públika, Samuel Marçal, informa orsamentu sira ne’ebé Governu empresta husi Banku Mundiál hodi utiliza ba dezenvolvimentu infraestrutura nian iha Timor-Leste laiha risku ba futuru, tanba nia funan ki’ik ne’ebé bele selu.
Nia admite katak daudaun públiku kestiona tanba saida mak Governu la foti osan iha Fundu Petrolíferu, maibé halo fali empréstimu iha banku sira no iha risku ka la’e ba nasaun nia futuru.
“Ita empresta, futuru laiha risku, tanba ita rai ita-nia osan iha Fundu Petrolíferu, nia funan iha banku ne’e boot liu duké ita foti ne’e nia funan”, Samuel Marçal hateten iha Meet the Press iha Palásiu Governu, Dili.
Iha sorin seluk, Reprezentante Banku Mundiál iha Timor-Leste, David Freedman, hateten Banku Mundial fó empréstimu ba nasaun sira ne’ebé sei dezenvolve hela, inklui Timor-Leste ho funan ne’ebé ki’ik tebes pur volta 0,75% ho objetivu atu ajuda nasaun sira ne’e nia kreximentu ekonómiku.
“Agora, Banku Mundiál fornese empréstimu ba nasaun sira iha dezenvolvimentu ho funan ne’ebé ki’ik tebes pur volta de 0,75 %, la to’o 1%, no bele selu husi tinan 30 to’o tinan 40”, Freedman dehan.
Husi orsamentu ne’ebé banku fó empréstimu bazeia ba padraun Fundu Monetáriu Internasionál (FMI), katak husi montante empréstimu 60% mak sai hanesan subvensaun.
“Ezemplu, Timor-Leste deve millaun $100, montante ne’ebé atu fó fila iha futuru bainhira ita halo komparasaun ne’e hanesan millaun $40, katak millaun $60 sai hanesan komponente subvensaun”, nia dehan.
Hodi subliña katak fundu ne’ebé Timor-Leste empresta iha Banku Mundiál daudaun ativu hela hamutuk millaun $59, ne’ebé destina ba konstrusaun estrada nian.
“Ita halo komprasaun kustu finansiamentu husi Banku Mundiál, ita bele dehan katak empréstimu ne’e vantajen boot, tanba Timor-Leste iha Fundu Mina-rai ne’ebé hetan retornu no bele selu fali empréstimu ne’ebé funan ki’ik, ida-ne’e sai hanesan vantajen ida”, nia hato’o.
Banku Mundiál prezensa iha Timor-Leste, serve nu’udar parseiru dezenvolvimentu prinsipál dezde nasaun nia independénsia, liuhusi fornese asisténsia finanseira ne’ebé signifikativa, téknika, no konsellu polítika hodi apoia dezenvolvimentu infraestrutura, jestaun finanseira públika, no setór sosiál xave sira hanesan saúde no edukasaun.
Notísia relevante: Banku Mundiál hakarak reabilitasaun estrada Glenu-Letefoho tenke garante nia kualidade
Jornalista: Arminda Fonseca
Editora: Maria Auxiliadora
