DILI, 29 Setembru 2025 (TATOLI) – Banku Mundiál iha Timor-Leste aprova ona orsamentu ba projetu reabilitasaun estrada ligasaun Glenu bá Letefoho, munisípiu Ermera, no husu Governu tenke garante nia kualidade.
Reprezentante Banku Mundiál iha Timor-Leste, David Freedman, hateten liga ba dezenvolvimentu infraestrutura iha Timor-Leste Banku Mundiál komprometidu fó nafatin apoiu tomak.
“Ami grupu Banku Mundiál kompromete serbisu hamutuk ho Governu nu’udar parseiru. Ita-nia objetivu kona-ba projetu estrada Glenu-Letefoho ho Governu hanesan, hakarak projetu ida-ne’e bele implementa ho lalais, efisiénsia, no kualidade. Ita mós hatene katak, kondisaun estrada ita presiza duni, maibé iha tempu hanesan ita mós iha kompromisu asegura kualidade prosesu aprovizionamentu hotu”, David Freedman dehan ba Tatoli, ohin.
Nia subliña katak ho situasaun sira ne’e, daudaun Governu ho Banku Mundiál halo kooperasaun ida ne’ebé la’o hela, Banku Mundiál laiha interese ba empreza A ka Ba mak manán, maibé hakarak mak asegura nia kualidade de’it.
Kona-ba orsamentu ba projetu ne’e aprova ona iha Konsellu Administrasaun Banku Mundiál iha Estadu Unidu molok asina akordu ho Governu.
“Klaru katak Banku Mundiál aprova projetu ida-ne’e, maibé agora ita tama ba implementasaun maka ita presiza mantein ita-nia kooperasaun ne’e, garante nia kualidade, integridade husi prosesu hotu hodi atinje ita-nia objetivu hamutuk”, nia subliña.
Iha sorin seluk, Ministru Obra Públika, Samuel Marçal, hateten Governu halo hela esforsu hotu no Banku Mundiál, iha sesta 25 Setembru 2025, fó ona resposta no ohin parte tékniku sira sei tuur hamutuk haree, tanba iha pergunta balu husi Banku Mundiál ne’ebé tenke fó resposta.
Lembra katak, iha loron 15 Jullu 2025, Reprezentante Banku Mundiál iha Timor-Leste, David Freedman, konfirma katak Governu halo empréstimu millaun $59 hodi realiza konstrusaun estrada husi Glenu bá postu Letefoho-Ermera no Letefoho bá administrativu Hatubuiliku-Ainaru.
David Freedman hateten projetu konstrusaun estrada husi Letefoho bá Hatubuiliku daudaun la’o hela, no husi Glenu bá Letefoho iha faze finál arovizionametu nian husi Komisaun Nasionál Aprovizinamentu (CNA, sigla portugés).
“Ami espera serbisu ne’e bele hahú daudaun ona. Projetu ne’e sempre iha fundu kontrapartida. Entaun, projetu ne’e 80% fornese husi Banku Mundiál no 20% husi Governu Timor-Leste ka maihusi orsamentu Estadu”, dehan.
Notisía relevante: Banku Mundiál fó empréstimu millaun $59 ba konstrusaun estrada Glenu-Letefoho-Hatubuiliku
Jornalista: Arminda Fonseca
Editora: Maria Auxiliadora
