DILI, 15 Jullu 2025 (TATOLI) – Reprezentante Banku Mundiál iha Timor-Leste, David Freedman, konfirma katak Governu halo empréstimu millaun $59 hodi realiza konstrusaun estrada husi Glenu bá Letefoho-Ermera no Letefoho bá postu administrativu Hatubuiliku-Ainaru.
David Freedman hateten projetu konstrusaun estrada husi Letefoho bá Hatubuiliku daudaun la’o hela, no husi Glenu bá Letefoho iha faze finál arovizionametu nian husi Komisaun Nasionál Aprovizinamentu (CNA, sigla portugés).
“Ami espera serbisu ne’e bele hahú daudaun ona. Projetu ne’e sempre iha fundu kontrapartida. Entaun, projetu ne’e 80% fornese husi Banku Mundiál no 20% husi Governu Timor-Leste ka maihusi orsamentu Estadu”, David Freedman hateten iha Timor Plaza.
Iha loron 16 Maiu 2023, Governu liuhusi Ministériu Obra Públika, hamutuk ho Banku Mundiál halo lansamentu fatuk dahuluk ba reabilitasaun estrada entre Letefoho bá Hatubuiliku.
Projetu ne’e finansia husi orsamentu empréstimu husi Banku Mundiál ho valór millaun $25,5 ne’ebé ezekuta husi empreza China Civil Engineering Construction Cooperation (CCECC). Projetu ne’e hala’o durante fulan-22 (tinan-rua), ho distánsia kilómetru 18.
Notisía relevante: MOP halo lansamentu fatuk dahuluk reabilita estrada Letefoho bá Hatubuilico
Kona-ba estrada ligasaun husi Glenu bá Letefoho, iha 23 Juñu 2025, Governu hahú normaliza hodi hein rezultadu prosesu aprovizinamentu ne’ebé daudaun la’o hela.
Normalizasaun ne’e hahú kedan husi Glenu bá Humboe, Eraulu, tama to’o Letefoho ho totál kilómetru 38 ne’ebé tuir planu sei konstrui iha tinan ne’e.
Jornalista: Arminda Fonseca
Editora: Maria Auxiliadora
