DILI, 15 Jullu 2025 (TATOLI)—Komisaun organizadora iha Ministériu Saúde liuhusi Servisu Nasionál Ambulánsia no Emerjénsia Médika, Institutu Publiku (SNAEM, I.P) ho parseiru sira hanesan Organizasaun Mundiál Saúde (OMS), Polisia Nasional Timor-Leste (PNTL), Bomberos, Cruz Vermeilha Timor-Leste (CVTL), Misaun Lepra, hala’o enkontru ikus ba preparasaun jogu deportivu CPLP ne’ebé sei hala’o iha 19-27 Jullu 2025 ne’e.
“Ohin, ita koordena liután kona-ba preparasaun servisu hodi atende ba ita-nia jogu desportivu CPLP atu envolve iha atividade ne’e, hodi halo diskusaun kle’an liután preprasaun ba jogu ne’e,” Koordenadór Nasionál iha Ministériu Saúde atuál Diretór Servisu Ambulansia Emerjénsia Médika, Simplício Amaral, hateten ba jornalista sira iha Kaikoli, ohin.
Nia informa, liuhusi enkontru ne’e atu orienta pesoál saúde sira hodi halo simulasaun oinsá atu halo atendementu ba atleta sira.
“Ohin mós ita ko’alia kona-ba simulasaun no ohin lorokraik ita sei halo, tanba jogu ne’e hela loron rua ka tolu hala’o ona. Tanba ne’e mak ohin husi ekipa nasionál liuliu ba ekipa sira-ne’ebé atu atende ba atleta sira,” nia dehan.
Daudaun ne’e pesoál saúde sira-ne’ebé korresponde ba atividade jogu desportivu ne’e hamutuk ema 150.
“Ita iha rekursu umanu ne’e la’ós de’it husi Ministériu Saúde mesak, maibé ho parseiru sira-ne’e mak hamutuk ema 150 atu halo atendementu ba iha atleta sira iha baze,” nia hateten.
Parte Servisu Nasionál Ambulánsia no Emerjénsia Médika hetan apoiu husi misaun Lepra, PNTL, Bombeuru mak prepara ambulánsia 10 hodi halo atendimentu ba atividade jogu ne’e rasik.
“Tuir informasaun ne’ebe iha ne’e iha estádiu hitu (7), entaun ambulánsia sira-ne’e ita koloka hotu iha ne’ebá husi jogu abertura ne’e. Ambulánsia no pesoál saúde sira hotu ita destaka hotu iha estádiu nasionál,” nia informa.
Koordenadór Krús Vermella Timor-Leste, Ricardo Afonso, informa sira-nia ema-ne’ebé apoiu ba atividade ne’e hamutuk 25, no husi numeru ne’e iha feto 10 no mane 15 mak sei halo asisténsia ba jogu ne’e rasik.
“Parte destakamentu ne’e oráriu husi SNAEM sira mak halo ba kada ema. Entaun, tuir informasaun katak iha fatin hira ne’e iha kampu futeból iha estádiu nasionál munisipal Dili, ita aloka ema na’in-ualu (8) no na’in-haat (4) ba iha kampu das Paraias Licidere. Sira seluk sei divizaun bazeia ba oráriu husi parte SNAEM,” nia dehan.
Nia informa, kona-ba sira-nia voluntáriu ne’ebé servisu ba primeru sukoru, hanesan sukurista ne’ebé mak halo ona atendementu iha atividade desportivu sira-ne’ebe realiza husi Federasaun Futeból Timor-Leste (FFTL) no ba tasa juvenil sira-ne’ebé realiza husi KOIKA.
“Ita-nia sukurista sira halo ona papel hanesan sukurista ba iha atendementu jogu sira-ne’ebé mak halo iha eventu jogu nível nasional sira,” nia hateten.
Jornalista : Felicidade Ximenes
Editór : Cancio Ximenes
