DILI, 01 Jullu 2026 (TATOLI)–Tribunál Judisiál Primeira Instánsia Dili (TJPID), Kuarta ne’e, liuhusi Juiza Turnu, Ercília de Jesus hasai despaisu hodi aplika prizaun preventiva ba arguidu D (sidadaun estranjeiru) tanba iha indísiu forte envolve iha krime haat ne’ebé Ministériu Públiku (MP) promove ba arguidu.
Krime haat ne’e mak hanesan Asosiasaun Kriminosa neebe previstu iha artigu 188 husi Kódigu Penál, krime Esplorasaun Ilísitu Jogu ne’ebé previstu iha artigu 322 husi Kódigu Penál, krime Brankamentu Kapitál ne’ebé previstu iha artigu 313 husi Kódigu Penál, no krime Fraude Fiskál ne’ebé previstu iha artigu 314 husi Kódigu Penál.
Notísia relevante : Kazu scam call center, MP alega arguidu D ho prizaun preventiva
Arguidu D nu’udar Jerente iha fatin prátika scam call center ne’ebé lokaliza iha área Tibar, Postu Administrativu Bazartete, Munisípiu Likisá.
Iha Sesta (26/06) foin lalais ne’e Autoridade Seguransa halo apreensaun no buska iha fatin prátika scam call center iha Tibar.
Bazeia ba Tribunál nia despaisu, arguidu nai’n-60 submete ba medida kausaun aprezentasaun períodika semana ida dala-iha, iha loron Sesta ba Eskuadra Polísia ne’ebé besik.
Tribunál liuhusi despaisu, deside katak arguidu na’in-60 selu kausaun osan, nune’e kada arguidu iha obrigasaun selu osan ho montante $2.500 durante loron-10, hahú sura husi despaisu fó sai.
Bainhira arguidu na’in-60 ne’e la selu osan kausaun mak sei iha konsekuénsia penál.
Jornalista : Natalino Costa
Editora : Julia Chatarina
