DILI, 20 Jullu 2025 (TATOLI)—Federasaun Xadrez Timor-Leste hamutuk ho Woman Fide Master husi Portuál, Margarida Coimbra, realiza jogu Xadres simultanea ba atelata Xadrez Timor-Leste na’in-20 iha ámbitu selebrasaun loron munsiál Xadrez.
“Entaun atu komemora loron ida-ne’e Xadrez mós hola parte iha jogu CPLP, nune’e jogu simultanea ne’e mak ita uza hodi komemora loron internasionál Xadrez,” Prezidente Federasaun Xadrez Timor-Leste (FXTL), Zeferino Viegas Tilman, informa ba jornalista sira iha CCD, Kaikoli, ohin.
Prezidente ne’e relata, daudaun ne’e ita iha Woman Wide Master husi portugál ne’ebé sei joga hasoru ita-nia jogadór timoroan sira-ne’ebé tuur ona iha meza no nia mesak mak sei kontra jogadór sira hotu.
Nia mós haktuir, Xadrez eziste iha Timor-Leste hahú iha tinan 2013 no iha tinan 2014 hahú halo nia kongresu to’o ohin loron, entaun Xadrez mós kompete ona iha jogu nivél internasionál sira no daudaun ne’e iha membru hamutuk 800 ne’ebé rejistu iha sistema FIDE.
“Ita iha Timor iha ona FIDE master na’in-ida (1), kandudatu master na’in-rua (2) no seluk iha posibilidade atu avansa ba oin. Tanba ne’e, Xadrez dezenvolve di’ak tebe-tebes no espera iha jogu CPLP bele avansa di’ak liután no FXTL mak rekomenda atu inklina mós iha jogu desportiva CPLP 2025,” nia informa.
Federasaun Xadres Timor-Leste (FXTL) iha planu atu realiza kampionatu nasionál maibé fundu limitadu no lahetan apoiu másimu husi entidade relevante sira, entaun liuhusi jogu CPLP bele atrai liutan entidade seluk hodi promove di’ak liután.
Maske nune’e, FXTL iha esforsu hodi tenta lori jogu Xadrez besik ba eskola sira atu estudante barak bele koñese kona-ba jogu ne’e rasik.
Iha biban ne’e mós tuir, Woman FIDE Master Portugál, Margarida Coimbra, hateten, ida-ne’e hanesan orgullu ida bele partisipa iha jogu ne’e rasik no kontente tebes haree joven barak mak antuziasmu hakarak halimar jogu Xadres.
“Entaun ita presiza dezenvolve di’ak liután hahú agora ba to’o futuru mai. Tanba ne’e, joven sira tenke aprende no partisipa másimu hodi mellora sira-nia koñesimentu ba jogu ida-ne’e rasik,” nia apela.
Jornalista : Alexandra da Costa
Editór : Cancio Ximenes
