DILI, 05 Juñu 2026 (TATOLI)–Governu liuhusi Primeiru-Ministru, Kay Rala Xanana Gusmao, hato’o relatóriu ba Prezidente Repúblika, José Ramos-Horta, kona-ba situasaun seguransa rai laran ne’ebé kategoria nu’udar krime normál no la hatudu senáriu hanesan tinan hirak liuba ne’ebé sempre ligadu ho grupu arte marsiál (GAM).
Priméiru-Ministru, Kay Rala Xanana Gusmão, hateten husi faktu sira-ne’ebé hato’o ba Xefe Estadu, to’o agora kazu sira-ne’ebé mosu mak hanesan oho-malu no baku-malu, maibé kazu violénsia ne’ebé ligadu ho arte marsiál sira menus tebes no la mosu baibain ona hanesan uluk.
“Ha’u hato’o ba Prezidente katak to’o agora ita krime normál, Ida oho ida, ida baku ida, buat sira-ne’e hotu. Maibé buat seluk hanesan uluk ne’ebé ita rona katak ligadu ba arte marsiál sira-ne’e menus liu, la mosu hanesan uluk,” PM Xanana Gusmão hateten ba jornalista sira iha Palásiu Prezidensiál Nicolau Lobato, Bairru`Pite, ohin.
Maske situasaun kontroladu, Governu foti desizaun hodi prolonga suspensaun ba atividade treinu no prátika arte marsiál sira-ne’e to’o loron 31 Dezembru 2026.
Desizaun ne’e foti hanesan pasu antisipasaun hodi labele provoka fali situasaun instabilidade, konsidera katak Timor-Leste sei enfrenta fali eleisaun prezidensiál iha tinan 2027.
”Tanba haree katak 2027 sei iha eleisaun prezidensiál, eleisaun iha fatin barak. Tanba ne’e mak Governu deside atu prolonga to’o 31 Dezembru tinan ida-ne’e, suspende treinu, prátika sira-ne’e hodi labele provoka fila-fali,” nia dehan.
Iha fatin hanesan, Prezidente Repúblika, José Ramos-Horta, mós fó apresiasaun boot ba foinsa’e no komunidade, tanba konsiénsia hametin dame hodi la hamosu kazu krime ruma durante selebrasaun boot rua ne’ebé foin liu daudaun.
”Prezidente mós apresia tebe-tebes iha 20 Maiu ne’e buat ida la akontese, Iwan Fals mai mós buat ida la akontese. Ita sente katak loron hirak ne’e, povuno foinsa’e sira la’o ba la’o mai, la akontese buat ida,” nia dehan.
Jornalista : Hortêncio Sanchez
Editór : Cancio Ximenes
