DILI, 02 setembru 2025 (TATOLI)–Xefe Estadu Maiór Jenerál Forsa Armada (XEMGFA) Tenente Jenerál Domingos Raul Falur Rate Laek rekoñese katak importante atu inklui teste psikolojia iha rekrutamentu Militár.
Tenente Jenerál Falur hato’o asuntu ne’e relasiona ho membru FALINTIL-Forsa Defeza Timor-Leste (F-FDTL) ne’ebé viola Regulamentu Disiplinár Militár, suisída, adultériu no seluk tan.
“Ba oin, bainhira iha rekrutamentu ba kadetes membru F-FDTL sira tenki aplika mós teste psikologia hodi hatene kona-ba membru sira-nia komportamentu, mentalidade no seluk tan, tanba psikologia sira ne’e sei reforsa iha área hotu iha área espesiál hotu, hodi haree hamutuk, nune’e kuandu sira tama iha Militár komportamentu di’ak no mentalidade di’ak, nune’e bele evita no prevene sira labele monu ba kazu sira ne’ebé mak la espera akontese,” Tenente Jenerál Falur hateten ba jornalista sira, iha Palásiu Prezidensiál, Bairru-Pité, Tersa ne’e.
Falur dehan, membru ne’ebé mak komete krime suisída no adultériu tanba aplika sala lisaun sira ne’ebé mak aprende ona, liuliu regulamentu ne’ebé aplika ona.
Notísia relevante : Kazu Liquiça, Komandu F-FDTL aplika ona sansaun disiplinar ba membru envolvidu
Nia haktuir, iha instituisaun F-FDTL sempre mosu kazu hanesan oho-an ho arma hanesan akontese iha Oekusi foin lalais no adultériu, maibé Komandu sempre tau-atensaun rigorozu atu membru sira la’o tuir regulamentu Militar.
“Iha instituisaun F-FDTL ne’e ita rigór kedas ona, ita iha pensamentu ne’ebé dook liu ona, ita evita sira halo hahalok sira ne’e, no agora lei mos iha ona, agora ninia implementasaun mak problema. Ita iha ona lei regula komportamentu ema nian, pratika ema nian ne’e antes sira tama ne’e hanorin ona sira,” Tenente Jenerál katak.
Aleinde ne’e, Falur nota mós katak mebru sira-ne’ebé komete viola Regulamentu Disiplinár Militár tanba karaktér ema idaidak nian, tanba instituisaun F-FDTL eduka nanis ona membru sira.
“Sira kuandu tama iha Militár ne’e hanorin ona, sira ne’e hanorin kona-ba hatais farda halo nusa, bainhira mak uza, o nia fuuk ne’e halo nusa, o nia komportamentu han tuur iha meza halo nusa, o ba hamriik iha ema nia sorin ne’e halo nusa, buat sira ne’e hanorin hotu ona. Soque implementasaun asemilasaun ne’e fraku,” nia tenik.
Hodi hatutan : “Tanba ne’e buat sira ne’e mosu tanba faktor umanu, ema mak halo mudansa no determinante, purtantu ema ne’e aplika sala buat ne’ebé nia aprende, ne’ebé lalika preokupa ida ne’e. Edukuasaun no mentalidade ne’e mak tenki muda.”
Jornalista : Natalino Costa
Editora : Julia Chatarina
