PEKÍN, 04 Setembru 2025 (TATOLI) – Prezidente Parlamentu Nasional (PPN), Maria Fernanda Lay, hamutuk ho líder mundial na’in-25, inklui Xefe Estadu no Xefe Governu, partisipa iha dezfile militar Xina iha sidade Pequim, iha Kuarta ne’e.
Dezfile militar ne’e ho objetivu buka atu hatudu forsa no kapasidade militar Xineza nian ba mundu, bainhira Prezidente Xineza, Xi Jinping hamriik hamutuk ho Prezidente Ruso, Vladimir Putin, no do líder Norte-koreanu, Kim Jong Un.
Ho konvite Prezidente Xi nian, prezensa PPN hatudu kompromísiu Timor-Leste nian ba relasaun bilaterál di’ak ho Xina.
Entre líder sira ne’ebé mak hola para iha parada militar ne’e, inklui mós prezensa husi Xefe Estadu sira husi nasaun membru ASEAN, inklui Prezidente Indonézia, Prabowo Subianto, Liu-Rai Kambodia, Norodom Sihamoni, Prezidente Laos, Thongloun Sisoulith, Primeiru-Ministru Malázia, Anwar Ibrahim, Xefe Militar Myanmar, Min Aung Hlaing, no Prezidente Vietname, Luong Cuong.
Dezfile ne’ebé mak realiza iha Prasa Tiananmen ho objetivu atu komemora 80.º aniversáriu ba fim ka rohan husi Funu Mundiál Da-Ruak, no mós demonstra arma-arsenál bo’ot Xina nian, incluindu mísseis nuklear sira, foguetes, lasers no drone sira ho forma oioin.
Entretantu, elikópteru no aviaun funu nian semo iha kalohan azul ho formasaun oioin durante minutu 70 nia laran no husik manu pombu hamutuk 80.000 hod reprezenta pás ba kalohan.
Dezfile bo’ot ne’e sai hanesan demonstrasaun planeada ho ninia presijaun militar, poder no patriotizmu, ho rihun ba rihun soldadu hatudu ekipamentu modernu Xina nian ba mundu.
Iha ninia diskursu durante dezfile, Prezidente Xi afirma, “Ohin loron, umanidade enfrenta atu hili entre pás ka funu, diálogu ou konfrontu, manan-manan hotu ou ida manan no ida lakon.”
Prezidente Xi fó sai ba ema 50.000-resin ne’ebé mak hola parte iha parada militar ne’e katak povu Xineza sempre mantein firmi iha istória ne’ebé loos hodi reafirma vizaun Xina nian ba pás no estabilidade globál.
Jornalista: Filomeno Martins
Editor: Rafael Ximenes de A. Belo
