DILI, 05 Setembru 2025 (TATOLI)–Diretór Jerál Servisu Rejistu Notariadu iha Ministériu Justisa (MJ), Agostinho Gonçalves Viera hateten, liña internet monu bele afeta ba sistema ajendamentu online ba pedidu emisaun no renovasaun pasaporte.
“Atendimentu ba ajendamentu online ne’e kada loron simu 140, kuandu nakonu ona entaun sistema save-an no hein fali loron tuir mai. Durante ne’e ita-nia ajendamentu online la’o di’ak, maibé tanba de’it liña internet entaun afeta ba atendimentu ajendamentu online maibé kuandu problema entaun ami buka rezolve kedan,” Diretór Jerál hato’o ba Jornalista sira iha nia knaar fatin,kolmera, Sesta ne’e.
Notísia relevante : MJ propoin millaun $1-resin ba produsaun pasaporte rihun 75 iha tinan oin
Nia dehan, la’ós ba ajendamentu online de’it, maibé dalaruma mós hasai foto mós hetan difikuldade.
“Tanba haree ba ita-nia ahi eletrisidade ne’ebé dalaruma mate derrepente depois lakan, entaun afeta ba ita-nia atendimentu sira ne’e dalaruma pauza to’o minutu 30 hafoin ida-ne’e ami kontaktu tékniku ministériu hodi halo kedan intervensaun, nune’e bele kontinua halo atendimentu ba ita-nia ema sira,” nia akresenta.
Diresaun Servisu Rejistu Notariadu daudaun iha ona jeradór no tékniku sira halo ona manutensaun no ba oin kuandu ahi mate jeradór ne’e lakan automátika hodi nune’e Notariadu kontinua fó atendimentu ba sidadaun sira.
Jornalista : Natalino Costa
Editora : Julia Chatarina
