Funsionáriu Edukasaun 132 iha Bobonaru tama lista reforma obrigatória
BOBONARU, 07 Janeiru 2026 (TATOLI)-Diretór Servisu Munisipál Edukasaun Bobonaru, Miguel Freitas, informa katak funsionáriu iha diresaun no manorin hamutuk na’in-132 mak tama lista reforma obrigatória iha tinan ne’e.
“Tuir lista ne’ebé ami simu husi nasionál iha ema na’in-132, ne’ebé tempu oin mai sira ne’e tenke reforma, maibé ami haree sira komesa para serbisu. Ami tenke haree despaxu ida tun mai para ona mak foin bele para, enkuantu seidauk iha orientasaun sira sei kontinua serbisu. Se sira husik hela sé mak atu subtitui”, nia informa ba Tatoli, ohin.
Kona-ba manorin ne’ebé atu subtitui reformadu sira, Miguel dehan Ministériu Edukasaun halo ona esforsu, nune’e nia husu ba inan-aman alunu sira atu labele laran-taridu ho falta profesór iha saladeaula.
“Husu ba inan-aman sira labele hanoin katak barak mak reforma ne’e profesór laiha ona. Ami sei esforsu nafatin, ita tenke tau neon hamutuk, karik iha fatin balun professor menus komunika ho ami sei prienxe”, dehan.
Lembra katak iha fulan-Maiu no Outubru 2024, Ministeriu Edukasaun koloka profesór Bolsa kandidatu hamutuk 150-resin ba eskola 43 iha Bobonaru.
Notísia relevante: Manorin emposadu 178 simu ona pose no kolokadu kedas
Jornalista: Sergio da Cruz
Editora: Maria Auxiliadora
