DILI, 25 Setembru 2025 (TATOLI) – Prezidente Repúblika José Ramos-Horta reafirma ninia kompromisu ba organiza eventu Dili Internasionál Maratona 2025 no konsidera eventu ne’e nu’udar aktu boot diplomasia desportiva no solidariedade nasionál nian.
Horta hato’o nia pozisaun ne’e bainhira realiza enkontru ho komisaun organizadora, Dili Internasionál Maratona Ministru Juventude Desportu Arte no Kultura (MJDAK), Nelyo Isaac Sarmento, iha Palásiu Prezidensiál, Prezidente Nicolau Lobato Dili, ohin.
Ministru Nelyo hateten, eventu ne’ebé ajenda ona ba loron 11 fulan-outubru 2025, nu’udar inisiativa direta ida-ne’ebé lidera hosi Prezidente Repúblika, José Ramos-Horta.
“Eventu ne’e lori tema sira-ne’ebé iha kbiit hanesan Halai ba Palestina, hodi espresa solidariedade Timor-Leste nian ba vítima sira husi konflitu, no selebra adezaun istórika nasaun nian ba ASEAN, hodi hatudu ita-nia papél nudar líder proativu ida ba pás no unidade rejionál,” Ministru Nelyo hateten bainhira ramata enkontru Xefe Estadu.
Ministru Nélyo Isaac mós konfirma katak, orsamentu operasionál prinsipál ba maratona ne’e garantia ona, hodi asegura eventu klase mundiál ida-ne’ebé refleta aspirasaun aas liu nasaun nian.
“Ida-ne’e hetan apoiu entuziástiku hosi setór privadu, ho patosinadór (sponsor) liu sanulu ne’ebé komprometidu ona, inklui Timor Telecom nu’udar patrosinadór prinsipál, hamutuk ho parseiru boot sira seluk hanesan BNCTL, Timor Plaza, Hotel Timor, JL World, Auto Timor-Leste, TL Cement, Timor Lodge Hotel & Apartment, Bee Leste, no Oka Laran Di’ak,” Nelyo tenik.
Nia hatutan, Parseria públiku-privada ida-ne’e hatudu esforsu nasionál ida unifikadu atu halo vizaun Prezidente nian sai realidade istórika.
Atu insentiva liután partisipasaun no komisaun organizadora anunsia ona montante prémiu osan ne’ebé boot. Manán-na’in sira ba Full Marathon (42.195km) iha kategoria ASEAN+ no Timoroan sei simu prémiu prinsipál ho valór $4,000.
Iha Meia Maratona (21.0975km), prémiu boot liu ho valór $2,000 ba kategoria rua ne’e. Aleinde ne’e, eventu ne’e mós sei onra konkista husi para-atleta sira, ne’ebé manán-na’in ba halai 6Km sei simu $1,000.
Prémiu sira sei fahe ba manán-na’in oioin ho pozisaun aas iha kategoria ida-idak, hodi garante rekoñesimentu luan ba dedikasaun husi kompetidór sira.
Maratona ne’e sei sai pontu sentrál ba festivál dame, kultura no desportu nian durante loron tolu, husi loron 9 to’o 11 fulan-outubru, ne’ebé dezeña atu dada partisipasaun no hatudu ospitalidade Timoroan nian.
Gabinete Prezidente Repúblika nian habelar konvite formál ida ba komunidade diplomátika, parseiru ASEAN sira atu mai hamutuk ho Timor-Leste iha Dili ba okaziaun importante ida-ne’e, hodi halai la’ós de’it iha kompetisaun ida, maibé ba valór sira ne’ebé ita fahe ba malu hanesan dignidade umana, kooperasaun, no futuru ida-ne’ebé nakonu liután ho pás.
Preparativu ba eventu Dili Internasionál Maratona atinje ona 80%
Ministru Nelyo Isaac Sarmento informa, preparativu ba eventu Dili Internasionál Maratona dadaun ne’e atinje ona 80%.
“Kona-ba ita-nia atleta lokál sira konfirmadu hotu ona, maibé atleta sira husi nasaun ASEAN mak to’o agora seidauk konfirmadu, maibé antes fulan ne’e hotu ita bele konfirmadu ona, tanba eventu ne’e sei kurrida kilometru 43,” Ministru Nelyo hateten.
Governante ne’e dehan, daudaun ne’e tama ona ba faze koordenasaun tékniku entre lina ministeriál hotu atu nune’e bele kontribui ba susesu eventu ne’e rasik.
Tuir ajenda ne’ebé iha Dili Internasionál Maratona sei envolve mós atividade kulturál balun tanba fulan-Outubru hanesan fulan nasionál ba arte no kultura Timor-Leste nian.
“Dili Internasionál Maratona ita sei envolve mós atividade kulturál balun. Ita hatene outubru hanesan fulan nasionál ba arte kultura Timor-Leste nian, entaun sei konsentra hamutuk iha Palásiu Prezidensiál, sei iha feira arte-kulturál, sei iha Festivál ba hahán nian ba nasaun sira husi ASEAN tanba sira sei demostra sira-nia hahán. Ita sei iha mós jogu ki’ikoan sira hanesan tiru kalik, halai taru karon, tiru berlindus no konsertu múzika,” nia konklui.
Jornalista: Hortencio Sanchez
Editór: Rafael Ximenes de A. Belo
